EDITORYAL – 'Work of fiction' ra

Ang kontrobersyal nga libro salida nga "The Da Vinci Code" usa lang ka piksyon (fiction) kun hinimo-himo lang sa nagsuwat niini.

Ang tagsulat mismo niini nga si Dan Brown nagkanayon nga "work of fiction" ra ang maong libro kang kansang tuyo kun tumong mao ang paglingaw-lingaw ra sa mga bumabasa.

Apan sensitibo kaayo ang mga topiko nga gihisgutan sa maong libro. Makaguba sa pagtuo sa usa ka Kristiyano kon ang maong pagtuo huyang ra ug kun menos ra usab ang kaalam niini kabahin sa sinuwat nga gitawag og "work of fiction."

Sa pagsuwat nato niining editoryal wala pa makapakanaug sa ilang hukom ang MTRB nga maoy tigklasipikar sa mga pelikula. Manghinaot lang kita nga tun-an pag-ayo sa maong buhatan ang epekto sa ilang desisyon ngadto sa pagtuo sa mga tumatan-aw ilabi na kadtong mga wala kaayoy igong pagsabot sa giingon sa author nga "work of fiction."