Pagkakataw-anan

Nakapanglingo-lingo ko uy pagkasayod nga ang mga opisyal sa among barangay sa Lorega-San Miguel wala diay masayod kon duna ba sila'y gahum pagbutang sa preventive suspension sa ilang mga "appointive officials" ug "personnel" nga makahimo og salaod.

Diha pa ko masayod nga tinuod g'yod diay ang mga tabi-tabi nga akong nadungog nga kadaghanan sa among mga "Honorable Councilmen" wala g'yod diay magbasa sa mga lagda nga gilatid sa Local Government Code. Buyno mahimong nagbasa apan wala makasabot.

Tiaw mo, dihang sila si Konsehal Lorenzo Monsanto ug Manuel Geniston misugyot nga ang barangay secretary nga si Milagros "Mely" Merino ibutang nila sa preventive suspension samtang magpadayon ang imbistigasyon, hilom pa sa tirana ang sesyon sulod sa pipila ka gutling.

Si Merino ug ang revenue personnel nga si Edgar "Loloy" Nillas nag-atubang karon og imbistigasyon tungod sa giingong pagbulsa nila kabahin sa kwarta nga gibayad sa mga magbubuhis.

Himoon kini nila pinaagi sa pagpagamay sa kantidad nga isuwat nila sa duplicate ug triplicate copies sa resibo. Samtang ang resibo nga ihatag sa magbubuhis magpakita sa tinuoray'ng gibayran, sa duplicate gamay ra ang isuwat nga kantidad.

Aw nasayod na kamo og nganong gihimo kini nila. Miangkon na si Nillas nga nalambigit siya sa binuang. Si Merino maoy iyang sagad sugoon sa pagsuwat sa resibo kay dili man siya kaayo makakita.

Una, gisukna ni Kapitan Fortunato Parawan ang iyang mga konsehal kon si Merino nakahimo ba diay og salaod kon gisugo siya ni Nillas pagsuwat sa resibo? Matud ni Parawan nga sa iyang tan-aw wala makahimo'g sayop si Merino.

Dinhing tungora, mihilom na usab ang mga konsehal. Pastilan, pahinumdoman nako kamong mga konsehal nga kamo maoy representante sa katawhan ug ang katungod sa katawhan angay ninyo nga protehean.

Binisaya ang pinulongan nga gigamit sa sesyon sa barangay ug imposible nga dili sila makamao mosulti kon gituman pa nila ang ilang katungdanan.

Kon gigamit pa ninyo ang inyong mga sentido komon, masabtan g'yod unta ninyo nga nakasala si Merino? Una, silang duha si Merino ug Nillas dili mga accountable officers.

Apan sagdi na lang. Kon wala pa nila pagamya ang kantidad diha sa duplicate ug triplicate copies sa resibo, mahimong mapasaylo ra sila. Apan dili sila makalimod kay dunay ebidensya ani.

Sa resibo lang nga giisyu ngadto ni Arcadio Cortes ug Beverly Yu, tag P500 ang ilang gibayad, apan sa duplicate ug triplicate, makita nga P50 ra ang nabayran. Hain na man ang P900? Kana sa duha lang ka resibo.

Sa agi sa tawo nga nagsuwat sa resibo, klaro kaayo nga iya ni Merino, unya wala sila makahimo og salaod?. Tell that to the marines Capt.

Unya, unsa to, kon mopatuman mo og preventive suspension, nahadlok mo nga madoble na unya ang silot kon mopakanaug na og suspension order ang Ombudsman?

Ha! Ha! Ha! Pastilan, wala g'yod diay kamo makasabot og unsay kahulogan sa "preventive suspension."

Unya, unsa to, wala kamo masayod kon duna ba mo'y katungod pagbutang sa preventive suspension sa inyong secretary kay matud ninyo, kauban ra ninyo siya sa konseho?

Ipalihug kuno ko og pakli sa inyong Local Government Code ug basaha ang lagda nga gilatid sa section 85, paragraph (a) ug (b) aron madugang sa inyong kahibalo.

Ato ning sumpayan ugma. Akong balikon, sakop ko sa Lupong Tagapamayapa sa Lorega-San Miguel, apan dili kini pagasabton nga sigi na lang ta'g piyong kon dunay binuang.