EDITORYAL – Dakpon gayud ang nagsugo

Dihang gipahibawo siya nga ang "killer" ni Jojo dela Victoria usa ka polis ug kini nadakpan na, si Mayor Tomas Osmeña nagkanayon:

"We're not interested with the killer. We're interested with the mastermind."

Ang gisulti sa Mayor mi-reflect sa anaa usab sa hunahuna sa katawhan, ilabi na sa mga opisyal sa siyudad ug kadtong mga suod sa kinabuhi ni Jojo sama sa iyang biniyaang pamilya.

Husto ang Mayor. Human sikopa ang giingong killer ni Jojo, labaw sa tanan sikopon usab ang mastermind kun kadtong tawo nga nagsugo sa killer nga patyon si Jojo.

Dili pa masulbad ang murder sa kanhi direktor sa Bantay Dagat Commission sa siyudad kun dili pa madakpan ang mastermind.

Nanghinaut ang kadaghanan nga bantayan pag-ayo ang nasikop nga suspek tungod kay kun maka-ikyas kini hayan maka-ikyas usab ang hustisya sa kamatayon ni Jojo dela Victoria.