Layat sa Net

Kinamot ang una nakong tampo sa The Freeman. Nga, salamat sa kamanggiluy-on ni Ginong Juanito Jabat, namantala bisan kon ang akong agi maguwang lag dyutay sa kakha sa manok. Dihang giulog-ulogan ko niya pagdapit pagsuwat og lindog, napugos na kog panghuwam og makinilya.

Apan bisan nagamit na kog Wordstar, kinahanglan pa nakong iprinta ug ihatod ang akong sinuwat pinaagi sa pagbaktas paingon sa dan Manalili. Ang kaabog sa downtown ug akong kayam-angan nisangpot sa kanunayng pagpuwa sa akong mata. Nga akong gitabonan sa itom nga sunglasses.

Hangtod nga nakatigom na kog kuwarta. Nangita dayon ko sa kinabaratohan nga fax machine.

* * *

Dihang hapit na gyod unta ko motakilid paghabwa sa tanan nakong hiniposan, gihunghongan ko sa tindera nga nagkinahanglan kog linya sa telepono aron maka-fax. Sa wa pa ko hingpit moyaka aron mongaab, may laing nakasulti nako nga bisan wa koy Internet access mahimo nakong ipada ang akong lindog pinaagi sa Lotus Mail sa akong gitrabahoang ABS-CBN.

Hangtod karon, di pa kong kalimot sa kamaya sa akong gibati nga mora kong giduyan sa bag-ong teknolohiya. Di na ko kinahanglang magprinta ug mangunay pagtunol sa akong lindog ngadto ni Jerry Tundag. Salamat sa e-mail, gawas nga niputi nag balik akong mata, naluwas pa gyong mga tikod sa akong mga sapatos.

Di mahubit sa pung ang akong kalipay, hangtod karon magbutuk-butok pang akong kasingkasing kon mahinumdom, dihang nasipyat ang ABS-CBN paghatag nakog Internet access.

* * *

Haskang biliba nako sa Hotmail. Mas saba ang akong hudyaka dihang akong nakaplagan nga mas nindot ang Yahoo. Hangtod nga akong napamatud-an nga wa ra sa kumingking ang duha sa labing bag-o ug labing manggihatagon nga Gmail sa Google.

Mahibung tingali mo nganong nikalit lang kog kalami. Sa akong pagsuwat ini, nagbasa ko sa balita nga gitugotan na sa gobyerno sa San Franciso, California sa Estados Unidos ang Google sa paghatag og way kinutobang Internet access sa tibuok ug tanang suok sa dakbayan. Gawas pa, di pa kong katoo nga akoy gihimong commencement speaker sa mga gradwado sa computer courses sa STI College.

* * *

Akong giingnang mga tinun-an sa karaang linya nga silay ugma, ug gipun-an nga tungod sa ilang kahanas sa computers manghawod sila sa ugma. Apan ang tinuod nga nagdibal sa akong hunahuna maong hingpit nga paghimaya kon akoy gradwado sa STI nga tua sa San Francisco.

Salamat ni Edward Lim sa InTouch nga maoy nipatilaw namo sa kapaspas sa DSL, namasin ko pagpataod sa Smart Wifi. Bisan kon mokagar kon mag-uwan, ug salamat sa bagulbol sa akong kaubanan kon mokamang nang ilang DSL, lingaw ko sa akong unlimited Internet access.

Bahalag di na mabasa ang akong agi ug nipuwa na sang akong mata.

Email: leo_lastimosa@abs-cbn.com