Waa kini damha nga mahitabo kini dinhi sa atong lalawigan ug dakbayan. Ug natural, sa side lang sa turismo, makakabig kinig daghang mga langyaw nganhi sa atong dakbayan ug lalawigan.
Ug kon kini magmalampuson, atong mapaabot ang daghang mga benipesyo nga atong makutlo tapus sa maong Meet. Busa, gikinahanglan ang makoti nga pagpangandam alang ning maong event.
Kinahanglan nga ipadaplin nato makadiyot ang politika, mag-usa tang tanan ug himoon ang tanang humanly possible aron kini magmalampuson.
Sa ato pa, di ta mag-away-away. Mag-amigo tang tanan mientras tanto. Ug di nato akop-akopon ang tanang gimbuhaton, ug i-ignore na lang ang uban, as if kita ray kamao, kita ray maayong lake.
Mag-cease fire ta. Tapus sa Meet, balik sa normal, balik sa panagbingkil, balik sa away-away, balik sa mga intriga, balik sa away sa Talisay City, balik sa away sa Mandaue City, ug mahimong ipakapin natog away ang mga dakbayan sa Lapu-Lapu ug Danao. Layo' na tong Toledo City nga awayon.
Yes, baby, gikinahanglan ang earnest nga pangandam. Kinahanglan, alang kanatong mga Sugbuanon, it is a must nga magmalampuson, a must that it should not fail.
Ug alang sa kahapsay ug kalinaw, kinahanglan ba gyud nga mag-holiday ta? Kay ngano man diay, kon mag-holiday ta, mag-holiday ba sad diay ang mga terorista, ang mga kidnapper, ang mga holdupper, ang mga snatcher, ug ubang mga kriminal? Unsay hunahuna mo, Dro?