Kanus-a mohunong kining pag-inilogay sa gahom?

Napugos si Presidente Gloria Arroyo sa pagdeklarar sa State of Emergency sa tibuok nasud nga Pilipinhon tungod sa tinguhang kudeta sa ubang opisyal sa militar ug sa mga sakop sa oposisyon nga ilusad unta niadtong Pebrero 25 atol sa anibersaryo sa People Power I.

Sumala sa migawas nga kasayoran, gipangulohan kini ni General Danny Lim sa Philippine Ranger, nga mituyo gayod pagtawag kang Armed Forces Chief of Staff General Generoso Senga nga pabiyaon kang Presidente Arroyo.

Pastilan gayod kining hitaboa. Makaingon kita nga inay tabangan ang atong gobyerno aron mahaw-as kita sa kalisod, mao na hinuoy gipangandoy sa uban natong opisyal sa armadong kusog sa Pilipinas ug sa ubang opisyal sa kagamhanan ang pag-ilog sa gahom aron mao na usay molingkod sa Malakanyang.

Tiaw mo kana nga tulo na diay kuno ka tuig nga giplanohan ang pagpalagpot kang Arroyo. Kataas ba sa maong panahon? Kon kining panahona gigahin pa nila sa pagplano sa pagtabang sa atong gobiyerno aron magmauswagon ang atong ekonomiya, tibuok nasud nga Pilipinhon unta ang magmalipayon. Maangkon unta nato ang kauswagan, ug daghan kanato ang mahaw-as sa kakabos.

May kamatuoran gayod ang gisulti sa usa ka langyaw nga ang hinungdan nganong wala magmauswagon ang Pilipinas tungod kay ang kadaghanang mga opisyal sa atong gobyerno kulang sa pagmahal sa atong nasud. Sa ato pa, ang maong mga opisyal ang kaugalingong interes lamang ang gilantaw, dili ang kaayohan sa atong nasud ug kanatong mga Pilipino.

Kon mao, samtang dili mag-usab kining mga tawhana, dili gayod maangkon nato ang gitinguhang kalamboan sa atong nasud? Hangtod kanus-a ba diay mohunong kining pag-inilogay sa gahom sa atong gobiyerno?

Sakit kaayo pamalandongon nga pipila nato ka mga opisyal hakog sa gahom nga maoy hinungdan nga daghan ang nasakripisyo. Usa na niini ang atong ekonomiya. Inay tabangan nga mouswag ang atong kahimtang pinaagi sa pagtabang sa atong kagamhanan, mao hinuoy gihunahuna ang pag-ilog sa Malakanyang.

Ug kitang mga kabos ang labaw nga maapektohan.