EDITORYAL - Desisyon sa Vatican gihangop

Gihangop ug gikalipay sa mga Sugbuanon, ilabi na niadtong nahisakop sa Arsdiyosesis sa Sugbo ang desisyon sa Vatican nga lugwayan pa ang termino ni tinahud Ricardo Kardinal Vidal isip arsobispo sa Sugbo.

Si Kardinal Vidal nahimong arsobispo sa Sugbo sud na sa 25 ka tuig. Ug suma sa nabatasan, mi-file siya sa iyang intensyon sa pag retiro niadtong miaging Pebrero 6, 2006.

Gisalikway ni Pope Benedict XVI ang application for resignation ni Kardinal Vidal, usa ka timailhan nga ang Vatican kontento sa matang sa serbisyo nga gihatag sa pinanggang kardinal ngadto sa iyang gingsakopan.

Ang paghangop sa mga Sugbuanong Katoliko sa lugway nga gihatag sa Santo Papa ngadto ni Kardinal Vidal timailhan usab sa ilang pagkakontento sa matang sa pag-alagad ngadto kanila sa ilang Arsobispo.

Dili ikalalis nga ang matang sa pagserbisyo ni Kardinal Vidal ngadto sa mga Sugboanon malisud nga tupngan sa mga nanglabay'ng Arsobispo dinhi sa Sugbo.