EDITORYAL – Lihok sa Lihok Pilipina

Ang pasidungog nga nadawat sa Lihok Pilipina Foundation gikan sa tinamod nga institusyon, Ramon Aboitiz Foundation, Inc. (RAFI), usa ka pasidungog nga masaw-an sa kababayen-an sa Sugbo.

Maisip nga usa ka institusyon ang Lihok Pilipina tungod sa daghang kababayen-an nga natabangan niini.

Gawas pa, daghang krusada ang naapilan niining Lihok Pilipina gikan sa programa sa kalikupan, panginabuhian ngadto na sa pagpakig-alayon sa kagamhanang lokal alang sa pagpalambo sa pagkinabuhi sa kababayen-an.

Dakong kausaban sa kinabuhi sa kababayen-an ang pagkatukod niining Lihok Pilipina sukad niadtong 1985.

Busa, dili paigo ang pagakpak sa mga kamot nga mi-abiba sa dihang gidawat ni Tessie Fernandez ang award alang sa Lihok Pilipina, angayang tingban nato kini sa tanang suporta.