Nasayop ba ko?

Akong gidayeg si Regional Trial Court judge Geraldine Faith Econg kay dili siya sama sa ubang agawon nga magdumili sa pagtubag sa reklamo sa ilang mga kawani.

Gipasakaan man god og reklamo si judge Econg didto sa National Labor Relations Commission - ang labor court - sa usa niya ka kawani nga nangangkong gitaktak siya sa trabaho nga walay basihanan.

Aron masabtan sa kadaghanan, si judge Econg nanag-iya og restaurant uban sa iyang business partner nga usa ka Korean national. Wala man hinoo'y balaod nga nagdili sa huwes nga makabaton og negosyo.

Si judge Econg gipasakaan og reklamo didto sa NLRC ni Gresha T. Iriarte, 20-anyos, nga taga sitio Kaimito, barangay Lorega-San Miguel.

Nagtrabaho si Iriarte isip waitress sa Yu Hee Jeong Korean Restaurant nga gipanag-iya nila ni judge Econg ug sa iyang business partner.

Matud ni Iriarte nga nagsugod siya pagtrabaho sa restaurant nila ni Econg kaniadtong Febrero 24, 2004 ug gitaktak siya kaniadtong Enero 5, karong tuiga.

Nasuko ang manager nila ni Econg kay ang tanang mga kawani nila wala mo-duty sa first shift (9:30 sa buntag ngadto sa 2:30 sa hapon) kaniadtong pasko.

Apan gitataw hinoon ni judge Econg nga dili ra kadto maoy sala nga nahimo ni Gresha. Apan bisan pa niini, mitanyag og amicable settlement ang huwes.

Duna siya'y kantidad nga gitanyag ngadto sa complainant aron walay masilo kaniya. Yukbo ko nimo judge.

* * *

Wala g'yod ko masayop. Angay gayod nga ang mga korte butangan og gamay'ng amplifier alang sa mga huwes aron nga ang proceedings mabati g'yod sa mga manambong sa husay.

Nahinabi nako si RTC executive judge Simeon Dumdum Jr. ug iyang gibutyag nga angay g'yod unta nga dunay gamay'ng amplifier alang sa mga huwes nga hinay'g tingog, apan ang problema mao ang budget.

Maayo unta og ang mga civic groups, local government units o kadtong mga nagpakabana nga grupo, modonar niining maong kahimanan sa korte sa walay kapin nga kabubut-on.

Tanang adlaw anaa ko madistino sa korte isip reporter sa The Freeman. Dunay ubang huwes diha nga hinay kaayo og tingog. Dili na lang nako isulti og kinsa.

Maayo og sama ni judge Econg kay makadungog ka g'yod. Dili kaayo kusog apan dili hinay.

* * *

Lain pay ato. Usa ka gun club dinhi sa Sugbo mitanyag og tabang sa mga sakop sa media nga dunay mga lisensyado nga armas. Sila maoy mogasto sa mga bala alang sa target shooting.

Palihug, kadtong gusto nga mosalmot niining maong kahigayonan, kontaka lang ko ninyo. Bisan og wala ko'y armas apan ako maoy ilang gisaligan sa pag-coordinate sa mga sakop sa media nga dunay armas.

Walay pili ni. Mahimo nga taga radyo, TV ug newspaper ka nagtrabaho. Himoa sa labing dali nga panahon. Tawga ko sa opisina 2554263 o sa 0917-3836645.

* * *

Uy, unsa ning balita nga akong nadunggan? Duna kuno'y mayor nga nagplano pagpasaka og kaso sa kadagkoan sa PNP Crime Laboratory Service kay mipagawas kini og sayop nga report?

Usa ka kinawat nga sakyanan, nasakpan sa Traffic Management Group ug dihang gisumiter ni og macro etching didto sa PNP Crime Laboratory, ang ilang findings mao nga walay basihanan nga gitamper ang mga serial numbers.

Apan dihang gipa-macro etching pag-usab didto sa National Bureau of Investigation, namatud-an man nga gitamper ang serial numbers sa sakyanan. Hala ka diha!

* * *

Mag-uban ta pag-usab sa Miyerkules. Apan basaha ang Birador sa Freeman unya sa Martes.