Libreng tambal kuno

Makaingon tingali ang akong mga suki dinhi niining ubos kong lindog nga komon na kaayo kining maong estilo sa modus operandi. Apan akong nareyalisar ang panginahanglan sa pagsulat niini aron pagpahinumdom sa atong kaigsuonan sa makadaghang higayon nga angay silang magbantay niining maong estilo sa tinonto. Dili man god ang tanan kanato nasayod nga adunay estilo sa modus nga ingon niini.

Kasagaran duha ngadto sa upat ka tawo ang maghimo niini. Anha kini sila mopuwesto sa mga dapit nga dansohanan sa daghang mga tawo. Kasagaran, anha sila makaplagan duol sa mga simbahan ug sa mga wet market. Tapokon nila ang mga tawo pinaagi sa pagsibya diha sa mikropono nga manghatag silag libreng tambal. Dayag nga mohugop gyod ang mga tawo. Libre god!

Sa dihang modugok na kanila ang daghang mga tawo, ila kining hayloon nga ang ipanghatag nilang tambal may pakapin pa gayod nga numero sa masiao. (Duna pa bay masiao karon)? Pero ubos kini sa usa ka kondisyon: Mobayad og P50 ang gustong mahatagan og numero. Kadtong dili mobayad og P50 dili usab makaangkon og numero sa masiao.

Pero wala diha matapos ang estorya. Kon mohatag ka og P50, hayloon pa gayod ka sa mga suspek nga hatagan og jackpot number kon mohatag ka og P200.00. Kon mohatag ka, bugtian tuod kini sa jackpot number (kuno). Pero ang maong numero dili gayod mogawas. Sa ato pa, dili ka makadaog.

Igmat sab gayod kining maong mga suspek. Tiaw ba nga sa una nilang approach libre man kuno ang tambal? Pero himan-himan pa, labaw pa sa imong gibayran ang maong tambal kay pahatagon ka man og P50. Samot na kon mohatag ka og P200.00 para sa giingong jackpot number. Tabla rag nibayad kag mahal sa tambal nga gihatag sa mga suspek kanimo.

Ipatuo ra ba sa mga suspek nga ang tambal nga ilang ipanghatag promotion sa usa ka botika. Ambot kon unsa kini ka tinuod? Maayo unta nga masusi kini ug masanta ang mga tawo nga naghimo niining maong estilo sa pagpanglingla. Sumala sa naghatag nako niining maong impormasyon, adunay naghimo niini dihang dapita sa may Opon Church ug ingon man sa Sto. Niño.

Mao nga awhagon nako ang tanan nga magbantay batok niining maong estilo sa modus operandi. Ayaw kamo padala sa lingla!

( Sumbong ug reklamo? Text sa 0910-8105522)