Kon tuohan nimo ang report nga si P03 Edwin Alvarado nangilkil gikan sa tag-iya og tricycle nga iyang nadakpan tungod sa pag-operate gawas sa gitugot nga hurisdiksyon, angay g'yod siya nga silotan.
Gikataho nga si P03 Alvarado nangilkil unta og P2,000 gikan ni Alesandra Briones, ang tag-iya sa nadakpan niya nga tricycle aron nga dili na kini itanggong ang sakyanan.
Ang tricycle ni Briones gidakop ni P03 Alvarado kay nasakpan kini nga mibiyahe sa Talisay nga unta kutob ra man kini sa Minglanilla, apan gikataho nga iyang gipangayoan og P2,000 ang tag-iya.
Ang mga polis sa Minglanilla gipangayoan og tabang ni Briones hinungdan nga abtik dayon nga milihok ang team nga gipangulohan ni Senior Inspector Bonifacio Tecson.
Aw, natiklo g'yod si P03 Alvarado kay nasakpan siya sa akto nga midawat sa gipangayo niyang suborno. Kining matanga sa polis dili angay'ng padugayon diha sa organisasyon sa kapolisan.
Tukma lang nga kini si J01 Ariel Capilla pasakaan og kaso aron tanggongon sa bilanggoan, unya dili hatagan og higayon nga mahimong trustee, adto g'yod sa selda tanggonga.
Pakauwaw lang. Gwardya ka na, gamit ka pa'g shabu? Mas maayo usab hinoon nga mentras sayo pa, nasakpan ang imong kabuang.
Kini si J01 Capilla nasakpan kini nga matud pa nagsuyop og shabu didto sa barangay Pasil kaniadtong Biyernes sa gabii.
Maayo unta og ang mga tinugyanan sa Bureau of Jail Management and Penology dili molaban-laban sa ilang sakop nga nakasala.
Ang texter mihatag og katin-awan nga kon duna may binuang sa pipila ka babaye nga nagtrabaho isip GRO sa ilang bar, kaugalingon na kini sa mga babaye human sa ilang duty.
Matud sa texter nga wala g'yoy "bar fine" diha sa Steve's KTV Bar. Buyno, inyo usab na, ug ang NBI duna sa'y ilang lahi nga pamahayag nga ang uban sa mga babaye diha andam magpa-check out.
Ang termino nga "bar fine" maoy ibayad sa mga lalaki ngadto sa tagdumala sa mga bar kon tinguha nila nga ang usa ka dancer o GRO nga nagtrabaho sa bar ilang dad-on sa gawas.
Sagdi lang, mora'g dunay subli nga operation ang NBI sa mga nahimoan na nila og operation aron pagsuta kon wala ba gihapon kini mausab.
Kanang imong gihisgotan nga duha ka Bar nga matud nimo mas grabe pa og kalihukan, target kana sa ubang mga operation sa atong kapolisan ug NBI. Huwata lang.
Ang pipila ka sakop sa media nga nasayod niini, miuyon lang usab nga dili usa kini ibutyag. Kon unsa kini, basin og karong semanaha mapagawas na.
Dili lang nako ibutyag kay wala ra ba ko'y pagtugot. Mora'g duha na man ka ingon niini nga hitabo nga wala dayon mabutyag sa publiko.
Kadtong usa, nabutyag dihang human na. Ayaw lang usa liboga ang inyong huna-huna.