Ayaw'g samoti ang tensiyon

Wala gihapon mabugnaw ang tensiyon sa kauluhan tungod sa desididong pagpadayon sa pagpanggukod sa mga prominenting tawo nga gituohan sa Malacañang nga kakunsabo sa pagsulay og lusad og kudeta batok sa kagamhanan ni Pres. Gloria Arroyo.

Ang Malacañang kagahapon padayong igmat ug nang-aresto sa mga nagkadaiyang personalidad, samtang laing heneral sa Armadong Kusog ang girelibohan kagahapon tungod sa pagtuong apil kini sa mga sakop sa militar nga gituohang nakig-alayon sa oposisyon paglusad og kudeta.

Daghan ang nahadlok nga ang Proclamation No. 1017 ni Pres. Arroyo dalan na paingon sa Martial Law. Nakita sa mga tigpaniid sa lakat sa politika sa nasud nga mga aksiyon karon sa Malacañang wala na mahatukma sa tinuoray nga konsepto sa state of national emergency.

Sumala pa sa mga batid sa siyensiya sa politika nga ang pagpang-aresto sa mga personalidad nga kakunsabo pagpatikyaob sa kasamtangang gobyerno nga walay warrant of arrest buhat sa kagamhanan nga ubos sa diktadoriya. Dugang pa nila nga ang pag-take over sa mga publikasyong gikahadlokang oposisyonista og tonada sa peryodiko usa ka buhat sa kagamhanang ubos sa martial law.

Samtang walay mikuwestiyon sa 'validity' sa Proclamation No. 1017 ni Pres. Arroyo, isipon kini nga balido ug nahasubay sa Batakang Balaod. Mas maayong may mokuwestiyon niini didto sa Korte Suprema kay mao kini ang gitahasan sa balaod pag-review sa mga balaod.

Mao gani nga imbes modungag ko og tensiyon sa tagsatagsa ninyo, ang ako na lang ipanawagan nga mag-ampo na lang kita. Dugag pagtuki kalabot sa national emergency makadungag kanato og kahingawa ug kahadlok hangtod nga dili na lang hinuon kita makabuhat sa hustong mga butang nga angayan natong himuon aron kita mabuhi niining nasura.

Nagtuo man gud ko nga ang pagka-kalmado sa usa'g usa maoy makabugnaw sa isi'g ka habig. Dili ko motuo nga si Pres. Arroyo makaako sa pagpaubos sa nasud sa martial law.

Nasayod akong nasayod si Arroyo unsa ka-itom ang milabay'ng rehimen ni anhing Pres. Ferdinand Marcos. Dako akong pagtuo nga nga si Arroyo wala molubad sa pagkamahigugmaon niini sa demokrasya.

* * *

OVERREACTION. Dili pa kita angayang mo-react sa pagdeklarar sa atong nasud nga ubos sa state of emergency.

Kun nahimong OA (overracting) ang Malacañang sa nagkadaghang protesta sa kadalanan batok sa iyang kagamhanan, dili nato parangan og pagka-OA ang iyang deklarasyon.

Mabugnaw ra kana, nagtuo ko.

Ang ako man gud, kun samutan pa nato, mosamot og kainit ang Malacañang.

Duna na hinuon silay rason nga ipadayon ang state of national emergency o ideklarar na lang hinuon ang martial law. Kana gyud hinuoy dili angayang mahitabo.

Maayo gani kay dinhi sa Sugbo, ang tensiyon gipabugnaw ni Mayor Tomas Osmeña.

Dinhi ko mi-bilib ni Tomas.

Giawhag niya ang mga Sugboanon sa dili pagpanumbaling sa deklarasyon ni Arroyo.

Protesta ug pagsaway sa kagamhanan pasagdan lang, mao kini palisiya ni Tomas. Usa kini ka paagi nga pagbugnaw sa katensiyonado sa sitwasyon.

Kay kun may mayor pa kita nga OA usab, mo-overreact dayon sa deklarasyon. Tingale wala nay kalahian ang Sugbo ug Manila ang kagubot ug kasamok.

* * *

HAMBOG. Nanghambog ang City Traffic Operations and Management sa minilyon ka pesos nga nakolekta nila gikan sa nagkadaiyang traffic violations sa mga motorista.

Wala gani hunahunaa ang ilegal nilang pagpaningil sa mga nangaging mga multahanan nga nahupas (mi-prescribe) na sumala sa gimbut-an sa balaod apan padayon gihapon gipaningil sa Citom bugti sa pag-release sa mga sakyanan nga naguroy tungod kay na-clamp.

Nakasulay na ko nga gi-clamp ang akong sakyanan. Imbes P500 ra ang multa tungod sa ilegal nako nga pag-parking atubangan sa ganghaan sa akong alma mater nga Cebu Normal University, gipabayad ko lakip na sa nangaging mga kalapasan nga mi-prescribe na unta tungod kay milapas na ang unom ka bulan.

Ang balaod nagkanayon nga sa mga gagmay nga salaod, sama sa traffic violation, mahupas (prescribe) na ang penalty o multa.

Apan wala tumana sa Citom ang balaod. Daghan nang mga opisyal sa kagamhanan sa dakbayan ang nasayod nga ilegal ang pagpaningil og multa bisan hupas na.

Wala lang gyud tingale mataymingi og tawong mosukol gyud sa Citom ug sulayan sa pagkiha ngadto sa korte.

Kita, kay bise man kaayo kita ug walay panahon sa pagkuwestiyon sa korte sa ilegal nga gihimo sa Citom, kutob ra gyud kita sa pagbayad dalang kusmod.

* * *

ADJUDICATON. Adunay estilo kining Citom aron ma-'iban-ibanan' ang pagkamalapason niini sa balaod. Gipatuman nila kining gitawag og adjudication nga ang motorista nga adunay dakong "utang" sa multahanan sa Citom tungod sa mga traffic violations mosang-at og affidavit of adjudication nga ipasa ug papirmahan ni Tomas.

Kun mosugot si Tomas, papas ang multahanan o kaha pagamyan lang ang bayran. Kun dili, aw, bayad na lang.

Aduna usab sila niining affidavit of undertaking nga manumpa ang motorista sa pagpresentar og ebidensiya nga dili iya kadtong mga nangaging kalapasan ug iya sa kanhi tag-iya sa sakyanan.

Apan, kining duha ka paagi dili makatambal sa depektoso nga paagi sa Citom. Ang maayong buhaton, undangon kini.