Yangungo batok sa LTO

Sa kadaghan sa mga salawayong ahensiya nga gidumala sa gobyerno, usa ang Land Transportation Office (LTO) sa kanunay gayod gireklamo dinhi sa akong lindog. Nagkadaiya lang ang mga yangungo batok niining maong buhatan. Kon magbasa ko sa mga reklamo nga ipaagi sa text, makaingon na lang ko nga "pastilan".

Si Dr. Daan Dionson sa Medical Corner atbang gayod sa Mandaue LTO nagreklamo bahin sa daghang fixers nga usa sa naghatag og kahasol sa mga aplikante sa iyang lab. Si Dr. Dionson matawagan sa landline nga 345-0666. Ambot kon nasulbad na ba kaha ang iyang problema karon.

* * *

Nia pa gyoy laing reklamo nga akong nadawat karong bag-o. Ang sumbong nga gipaagi sa text nagkanayon: "Good day, Sir. Bag-o lang ko nilukat og driver's license. Inigdayon nimog sulod sa LTO, makabasa ka sa pahimangno nga Beware of Fixers. Pero didto sa sulod sa buhatan, mismo mga empleyado mao ang manguwarta. Usa lang ka adlaw, human dayon ang transaksiyon niadtong mobayad sa fixer o kaha mismo sa taga LTO. Pero kaming way ikabayad, hapit tulo ka adlaw. Anha pa gyod sa among atubangan magbinayranay. Tiguwang ug batan-on nga empleyado way mapili. Hinaot mahatagan kinig atensiyon sa mga tinugyanan."-- 0910-8963267

* * *

Morag tulibagbag kaayong pamation kon tinuod man ugaling ang imong gisumbong nga lakip ang mga empleyado sa LTO manguwarta ug miapil na sa buhat sa mga fixers. Mas eskandalosong pamation kon sa atubangan mismo sa ubang aplikante dayag ang binayranay.

Maayong himoan kini og pakisusi aron masuta kon unsa kini ka tinuod. Morag dili maayo kon magpadayon kining maong sistema. Aron makita sa publiko ang kaligdong sa LTO, kinahanglang dili sila moawat sa bisan unsang matang sa binuhatan sa mga fixers.

* * *

Sa laing bahin, dili usab igo ang ilang pagbutang og pahimangno nga "Beware of fixers". Ang angay buhaton sa taga LTO mao ang dili pagdawat og bisan unsang transaksiyon gikan sa mga fixers aron dili na mosalir ang tinonto sa maong mga badlongon sa katilingban.

* * *

Sa laing bahin: "Good day. Grabe ang Globe manguha og load. Mag-load mi og P25, nadawat namo ang message nga Autoloadmax. Pero ang among balance kay 0.00. Wa gyod mi kadawat og load." -- 0927-5673167 (Sent: October 28, 2005--12:46:12)

Maayong ikapasabot sa mga network provider ang mga panghitabo nga ingon niini. Sa ingon, dili na magbagulbol ang mga subscriber.

Sumbong ug reklamo? Text sa 0910-8105522