Pangwarta?

Gipaimbestigar na g'yod ni Cebu provincial police director Vic Loot ang polis nga si SP02 Nelson Ducay nga maoy mibakwi sa kaso nga gipasaka batok sa duha ka dinakpang suspetsadong drug pusher.

Nahinabi nako kagahapon si Chief Inspector Juanito Enguera, ang hepe sa Provincial Intelligence and Investigation Branch ug gitug-anan ko niya nga siya ang gitahasan ni Loot pag-imbestigar sa kaso.

Matud ni Enguera nga ang mayor sa San Fernando nga si Antonio "Abe" Canoy mitawag g'yod ni Koronel Loot og mireklamo sa kwestyonable kaayo nga kalihukan ni Ducay.

Buot sutaon ni Enguera kon tinuod ba nga ang pagbuhi sa dinakpan nga sila si Clifford Sabayton ug Junrel Sabayton naglambigit og kwarta, basi sa mga tabi-tabi nga nadawat sa mayor.

Sa ako na nga giingon, kadudahan g'yod tinuod ang gihimo ni Ducay tungod kay sila ang nagpasaka og kaso unya siya ra usab ang mi-withdraw.

Kon ibutang nato nga nahimong negative ang resulta sa laboratory examination sa shabu nga nasakmit gikan sa dinakpan, law-ay kaayo nga sila ra usab ang mo-withdraw sa kaso sa fiskaliya.

Nganong dili man nila huwaton nga ang fiskaliya maoy mohimo og resolusyon nga mag-dismiss sa kaso kon wala man g'yoy basihanan?

Apil sa sutaon ni Enguera ang report nga si Ducay nalambigit usab og susamang kaso didto sa Lapu-Lapu. Matud pa gi-withdraw usab ang gipasakang kaso sa fiskaliya.

Misuway ko pag-adto sa Cebu provincial police office apan wala nako makit-i si Ducay kagahapon.

Kining maong polis, anaa madistino sa Provincial Anti-Illegal Drugs Special Operations Task Force, usa ka police unit nga ang tahas mao ang paghimo og kampanya batok sa gidiling matang sa drugas.

Pareho mi og baruganan ni Loot ug Enguera nga law-ay kaayo paminawon nga unayon ra usab ni Ducay sa pagbakwi ang kaso nga gipasaka batok sa ilang dinakpan.

Si provincial prosecutor Pepita Jane Petralba miingon nga ang tukma g'yod unta mao nga huwaton ni Ducay nga ang fiskal mo-dismiss sa kaso kon wala may igong basihanan.

Apan daghang polis sa San Fernando nga nagduda g'yod. Buyno, hatagan usa nato og higayon si Ducay nga makapasabot kabahin sa maong isyu.

Karong buntag, si Ducay awhagon na sa paghatag og pagpasabot kon ngano nga siya ra man usab ang nagpa-withdraw sa kaso ug wala man magpaabot nga ang fiskaliya ang mo-dismiss kon walay basihanan.

* * *

Nakadawat ko og text message kagahapon gikan sa usa ka nagpaila nga polis. Tawgon lang nako og Agent 100.

Mitug-an siya kanako kabahin sa abilidad sa iyang mga kauban nga magsigi og pangilkil gikan sa mga tigpasiugda og sugalan.

Dili lang usa nako ibutyag ang ngalan aning maong mga polis, ilabi na nga kaila nako sila pulos. Wala kini magpasabot nga giprotehean nako sila, apan tambagan lang nato nga mohunong.

Ang mga apelyido sa maong mga polis, ang usa "D" ug ang usa "E." Kon wala ko masayop, kini si "E" naa ni sa Parian police station, unya si "D" naa sa Carbon police station.

Gihilasan ang atong informer kay kaniadto kuno, magsakay pa g'yod og patrol car ang maong mga polis, karon nuon magsakay na lang og multicab og usahay motor.

Buyno, tambag lang nako sa maong duha ka polis, ayaw kaayo mo palabi kay dunay naniid kaninyo.

Awhagon usab nako ang mipadala kanato sa maong inpormasyon nga hatagan nato og higayon nga mag-usab sila si "E" ug "D" apan kon dili, buhatan nato sila og report.

* * *

Atensyon mga sakop sa Department of Engineering and Public Works (DEPW), tungod sa pipila ka adlaw na nga pag-uwan, daghang karsada ang nangaguba.

Nangaukal ang aspalto nga inyong gibutang. Apil sa mga dapit nga naguba ang karsada mao ang Sikatuna gikan sa eskena T. Padilla; Manalili unahan sa Freeman; P. del Rosario ug daghan pa.