Hokus-Corpuz

Si Eugenio "Gabby" Lopez III, chairman ug chief executive officer sa ABS-CBN, bisan sa iyang pagsalikway sa pipila ka bahin sa resulta sa imbestigasyon sa Task Force Ultra, subling niangkon og responsibilidad sa trahedya. Ambot tungod ba sa kadaghan sa nangamatay o lahi lang gyod si Lopez, tagsa rang mga lider sa negosyo o gobyerno nga makaambas sa iyang kaandam pagpaubos. Lisod nang daan ang pag-angkon sa mga kakuwangan sa ABS-CBN, mas lisod ang pagbarug ni Lopez sa responsibilidad nga iyang giangkon.

Minilyon ka pesos nang nagasto sa kompaniya sa paghipos sa mga patayng lawas, pagpatambal sa mga naangol sa stampede ug pagpapauli sa mas daghang nabawo pag-apil unta sa unang sumad sa Wowowee. Ang kamanggihatagon sa ABS-CBN di makasagang kon duna gyoy mga biktima nga modangop sa hukmanan aron magpabayad og dugang o kon tinud-on ang hudlat sa hingtungdang mga ahensiya sa gobyerno pagbalhog sa mga tigpasiugda ngadto sa bilanggoan. Bisan pa kon mahitabo ni, nipasalig si Lopez nga di mohunong ang ABS-CBN pagtuman sa iyang mga obligasyon ngadto sa mga biktima.

* * *

Tungod sa trahedya, nakabuylo ang nagkalainlaing mga grupo nga dugay nang naglungutlungot sa labing dakong kompaniya sa media sa Pilipinas:

o Ang mga karibal sa media nag-piyesta kay gawas nga wa silang katay-og sa pagdominar sa ABS-CBN sa Sugbo, Davao ug ubang dagkong rehiyon sa nasud nasakmit pa gyod pagbalik ang liderato sa time slots di lang sa Wowowee kon dili hasta na sa kinabag-an sa prime time programs sa Metro Manila;

o Ang mga politiko nga nagtan-aw sa ABS-CBN nga hulga sa ilang mga ambisyon ug pagpabilin sa gahom nagpatuyang na lang karon pagluwat og bisan unsang mahunahunaan nilang hudlat, gikan sa pagpriso sa mga opisyal ngadto sa pagtak-op gyod sa tanan niyang estasyon sa radyo ug telebisyon; ug

o Ang ubang mga oportunista nga nikabayo sa nasudnong pagbangotan aron lang pagsalida.

* * *

Nangayo nag pasaylo si DILG Secretary Marius Corpuz sa ABS-CBN sa iyang pagpasangil nga giisip sa kompaniya ang mga tawo nga mga hayop. Matod ni Corpuz gawas nga iya ra tong kaugalingong baruganan, sa ato pa way labot ang iyang kaubanan sa Task Force Ultra, bunga pa gyod to sa iyang emosyon. Samtang gidawat na sa ABS-CBN ang pagpangayog pasaylo ni Corpuz, angayng susihon tarung bang kabuot ni Corpuz.

Kay abunda ang mga ebidensiya nga likoy ang pangutok ni Corpuz. Ang iyang pagdupa sa mga anomaliya sa BBRC-bahalag nasudlan og banda ug mga babaye ni kanhi mayor Ruben Ecleo Jr.--sa usa ka bahin, ug ang iyang pagkondenar sa ABS-CBN bisan way klarong ebidensiya sa pikas nga bahin, makapalig-on sa pagduda sa iyang kahaom sa katungdanan.

* * *

Email: [email protected]