Mangibot og ngipon

Karong panahona bisan unsa na lang ang nahunahunaan nga raket sa tawo aron makakuwarta. Importante man god ang survival niining panahon karon nga misamot ang kalisod. Walay kuwestiyon kon ang himoon nga raket dili salawayon ug dili makahasol sa isigkatawo. Ang nakapait kay adunay uban nga misagop sa salawayong paagi sa ilang pagraket.

Sama niining gisumbong sa usa ka magbabasa niining atong lindog. Sumala sa iyang text, aduna kunoy mangibot og ngipon diha sa Freedom. Wala iklaro sa text kon unsa kining tawhana, dentist ba o nagpaka-dentist lang. Basta kay mangibot kunog ngipon kining tawhana.

Ang nakaapan lang kay morag may sagol tinonto ang estilo niining maong mangibotay og ngipon. Kon tinuod ug maoy tuohan ang sumbong sa atong texter, dili maayo ang gibuhat niining tawhana. Tiaw ba god nga sagol panghadlok man kuno ang gibuhat niining maong tawo aron lang makakuwarta. Manghadlok kuno kining tawhana aron lang adunay magpaibot og ngipon kaniya.

Ang atong texter miangkon nga usa siya sa nabiktima niining maong tawo. May kauban kini sa pagpahigayon sa modus operandi niini. Ang ilang estilo mao nga magbutang sila og lamesa nga gamay sa dapit sa Freedom Park nga maoy gihimo nilang puwesto. Sa ibabaw sa maong lamesa gipahimutang ang daghang mga ngipon.

Usa ka higayon niana, ang atong texter naikag pagtan-aw sa mga ngipon nga gipatong sa ibabaw sa lamesa. Apan sa kalit lang dihay duha ka tawo nga miduol kaniya. Ang usa migunit sa iyang baba ug ang lain migunit sa iyang ulo.

"Ila kong gipugos sa pagpanganga kay ilang tan-awon kon naa bay lungag ang akong ngipon ug nibalibad ko," asoy sa atong texter. "Pero wala koy nahimo kay halos ilang lubagon ang akong liog ug ulo. Nibalibad ko nga wa koy kuwarta. Ila kong gibira sa daplin ug ilang gipugos pag-ibot ang akong ngipon. Grabeng sakita, makamatay ang sakit! Nagpabayad sila og P250."

Usa kini ka dakong binuang. Nganong mamugos man sila sa tawo nga dili gustong magpaibot og ngipon?Ang nakapait kay hapit na lang lubagon nila ang ulo sa biktima. Mga salbahis. Kuwang na lang og diyotay kining mga tawhana ko dili manulis. Maayo unta kon mahinginlan kana sila diha sa Freedom Park.

"Manghinaot ko nga pinaagi nimo mabadlong kanang mangibot og ngipon diha sa Freedom Park," nagkanayon ang atong texter nga tag-iya sa cellphone number 0918-7771906. "Manghinaot ko nga mabadlong kining ilang binuang."

* * *

(Sumbong ug reklamo? Text sa 0910-8105522)