Walay uwaw!

Kay gilabanan man niadtong duha ka nadakpang sakop sa Bureau of Jail Management and Penology ang ilang mga kauban nga nalambigit sa pagpangilkil sa mga mosulod sa Bagong Buhay Rehabilitation Center, tukma lang nga sila maoy iduot sa maong kaso.

Dili na katuohan ang gibutyag nila ni jail guards Eveth Sy ug Mencho Landero nga ila ra kadtong kabubut-on nga mangolekta og "tax" gikan sa mga mosulod sa prisohan.

Kon ibutang nato nga tinuod man nga inyo ra kadtong kabubut-on, bagaa god ninyo'g nawong. Ngilngiga ninyo no, Jail Officer-1 pa ang inyong ranggo makamao na mo mangwarta pinaagi sa binuang?

Ang mga tawo nga ingon kaninyo og batasan wala g'yoy luna nga patrabahoon diha sa kagamhanan, ug bisan na gani sa pribadong sektor.

Anaa ra g'yod ninyong duha kon "um-omon" ninyo ang kaso kay maoy mopasuwabi ang inyong pagkatalawan. Nagtan-aw ko sa inyong mga dagway diha sa mantalaan, dili man unta mo kurakot og dagway.

Apan dihang nadungog nako ang balita nga kamong duha miangkon nga inyo ra kadtong mga kabubut-on nga kolektahan og "tax" ang mosulod sa prisohan nga magdala og mga baligya og ubang butang, nakapanglingo-lingo ko.

Ang tukma nga pulong para kaninyong duha mao nga "Wala mo'y uwaw." Awhagon nako ang mga tinugyanan sa BJMP nga pahamtangi g'yod sila og mga administrative sanctions, sama sa pagtaktak kanila sa serbisyo.

Kon inyo silang labanan, susama ra nga kamo naghatag og bindisyon sa ilang mga binuang.

* * *

Ang maong mga babayeng jail guards nadakpan sa mga ahente sa National Bureau of Investigation (NBI) atol sa entrapment operations nga gihimo didto mismo sa "gate" sa BBRC.

Nahimo ang entrapment operations dihang ang asawa sa usa ka priso nangayo'g tabang sa NBI kay wala makagusto nga ang mga gwardya magsigi na lang og pangayo nila'g "tax."

Ngilngiga god ninyo diha sa BBRC, ngano god tawon nga mangolekta man mo og buhis. Atong ibutang nga mangolekta mo og tax kay namaligya man ang maong mga priso sulod sa prisohan, daku kining binuang.

Kon itugot ninyo ang pagpamaligya og mga pagkaon sulod sa BBRC, ayaw ninyo kolektahi ang mga mopasulod og baligya.

Hinahay ra nga makasulod lang gihapon diha sa prisohan ang mga cellphones, TV sets kay wala man mahunong ang pagka kurakot sa ubang gwardya nga wala mabantayi sa mga opisyal.

Tiaw mo, kaniadto hasta ang video karaoke machine nga gipanag-iya sa usa ka banggiitang kriminal, nakamaneho sa pagsulod sa prisohan.

Kon imong pangutan-on kinsa ang nagpasulod, pulos ambot.

Maayo lang mong ilabay adto sa barangay Ambot, lungsod sa Limod.

* * *

Tungod kay dihang bag-o pa akong nahimong reporter, ang BBRC usa man sa akong "beat" suheto kaayo ko sa mga binuang diha sa maong bilanggoan.

Kamong ubang gwardya diha sa BBRC, ambot diin pa kaha mong espednoha kaniadto. Nakaila ba kamo ni Atty. Winefreda Geonzon?

Siya maoy gipasidunggan nga ang karsada diha sa BBRC gipahinungod kaniya kay dihang buhi pa si Atty. Geonzon gigugol niya ang iyang kinabuhi pag-atiman sa mga priso.

Dia ko'y libro nga gihatag mismo ni Geonzon nako nga nagbutyag sa mga anomaliya sa BBRC.

Mga priso kaniadto pagawason aron papangawaton, mga drugas ipasulod aron anha ibaligya sa prisohan, mga priso gipamatay ug daghan pa.

Nagsugod ko pag-cover sa BBRC dihang gidumala pa kini sa PC/INP. Dili kamo makalimod sa binuang diha.