Bantayi gyod ang budol-budol

Mga suki, bantayi gayod ninyo ang Budol-budol Gang. Dili pa lang dugay may nag-text nako nga aktibo na usab kining maong mga badlongon sa katilingban dinhi sa Kabisay-an tapos sa taudtaod nilang pagpakahilom.

Lainlain ang estilo sa ilang modus operandi. Adunay magpakaaron-ingnon nga negosyante og prutas, isda, sin, panapton, sakyanan ug daghan pang uban. Motanyag kunhay silag komisyon sa ilang biktimahon. Pakit-on nila sa bag nga puno sa kuwarta. Pero mahibulong ka nga daghan man unta silag kuwarta, manghuwam pa man sila sa ilang biktimahon.

Diay kay ang ilang kuwarta pulos walay kalag. Mao nga kon makailad na sila sa prospek nga mopahulam kanila sa tinuod nga kuwarta (dakong kantidad ra ba gyod), modiretso silag sibat. Pastilan! Bantayi ninyo kini.

* * *

Sa laing bahin, niadtong Enero 26 sa gabii nabiktima ko sa pagpang-harass sa wala nako mailhing mga tawo pinaagi sa cellphone. Makadisturbo ang ilang text. Makalagot pod.

Ingon niini ang text nga akong nadawat: "Hoy, ayaw nag tintala si Emelyn kay naa na siyay bana. Ayaw nang samoksamok sa pagpuyo sa among kauban, ha! Hibaw-an ta gani ko kinsa ka, bantay lang ka namo. Bisan adto pa ka sa lungag tago pangitaon gyod ka namo. Usab unyag text ni Ma'am, ha! Usba unya! Basin wala ka makaila sa imong gikaengkuwentro. Bantay lang kang gaoha, ka. Ingat ka lang unya namo!" -- 0910-2008980 (Jan. 26, 2006-21:23:01)

* * *

Wala akoy kaila nga Emelyn ug labaw nang dili nako kinaiya ang pag-text ngadto ni bisan kinsa nga dili nako kaila. Nagdaginot ko sa akong load. Dili man gani ko mo-reply sa mga text sa mga magbabasa sa akong lindog.

Nagtuo ko nga ang nagpadala kanako sa maong makadisturbo nga text nasayop lang sa pag-send niini sa akong numero. O ba kaha may sipat nga mihatag kaniya sa akong numero maong ako hinuon ang nabuthan sa dili akong binuhatan. Nag-miss call pa nakog makadaghan. Disturbo kaayo.

Akong awhag sa tag-iya niining numero 0910-2008980 nga sa sunod, seguroa nga dili kamo masayop sa pagpadala sa inyong mensahe ngadto sa laing tawo nga dili unta maoy angay padad-an ninyo niini. Makahasol kamo sa uban. Bastos ra ba kaayo ang inyong text. Nanghulga mo. Nindot gyod kaayo mong pasakaan og kaso.

Kon kinsay nakaila sa tag-iya niining cellphone number 0910-2008980, palihog tug-ani ko ninyo. Dili maayo kining ilang gihimo. Pataka lang silag padala og disturbing message ngadto sa tawo nga walay atraso nila.

Awhagon ko usab ang tanang magbabasa nga ayaw ninyo buhata ang ingon ngadto sa uban kay makasamok kini. Makahasol. Makadisturbo.

(Sumbong ug reklamo? Text sa 0910-8105522)