Sweldo patas-i

Tungod sa gamay ra nga sweldo, ang Public Attorney's Office nahimo lang intawon nga "training ground" sa mga bag-ong abogado.

Ang PAO nahisama lang intawon sa sibyaanan DYLA nga nahimong training ground sa mga iladong broadcasters ug mga sakop sa print media.

Wala kini magpasabot nga nagmahay ko nga gagmay mi og sweldo sa DYLA, kay alang nako, katumbas ra man usab sa serbisyo nga gipangayo sa management.

Apan kining mga abogado nga nadistino sa PAO, angay sila nga hatagan unta og arang-arang nga sweldo.

Makalolooy kaayo ang maong buhatan sa kagamhanan nga gitahasan sa paglaban sa mga tawo nga dili intawon makaabot pagkuha og serbisyo sa mga abogado nga dili na kaayo maserbisyohan.

Tiaw mo, 58 na lang ka abogado ang sakop sa maong buhatan sa pagka karon, nga unta ang ilang teritoryo mao man ang tibuok Central Visayas.

Kaniadto dihang ang PAO nagdala pa sa ngalan nga Citizens Legal Assistance Office (CLAO) duna pa kini'y 73 ka abogado. Kon husto lang ang akong "memory" mga tuig kadto 1989.

Dili maayo nga karon na hinoon nga nagkadaghan ang mga kaso mikunhod na ang gidaghanon sa mga abogado. Dili nato mabasol ang mga abogado nga kon makat-on na, mobalhin sa arang-arang og sweldo.

Tiaw mo, ang mga abogado nga labing ubos nila og ranggo mosweldo lang og mohapit P20,000 ang buwan. Labaw ra man kini'g gamay sa among mga reporter sa The Freeman.

Angay g'yod unta nga usbawan sa kagamhanan ang sweldo sa mga abogado sa PAO aron nga magdugay sab sila diha. Kon daghan god og mga kaso nga idangop kanila unya gamay ra ang mga abogado, mahimutang nga madali-dali ra ang pagtoon sa kaso.

Nagpasabot kini nga kuwang ang mga argumento sa mga abogado sa PAO kon makigkombati na sila sa abogado nga milaban sa pikas nga party panahon unya sa husay.

Dili ko motoo sa giingon nga mga dili makamao ang abogado sa PAO, kuwang lang sila og panahon sa pagtoon sa ilang kaso tungod sa kadaghan nga gi-assign kanila.

Sayonan ka nga ang abogado sa PAO idistino man sa usa ka court branch aron sila ang morepresentar sa mga kliyente nga walay kaugalingong abogado.

Kay nahisgotan man nato ang DYLA, ang akong ikasulti mao nga garbo lang usab mi kay nagpasabot nga ngilngig ang among estasyon motudlo og mga bag-ong reporters kay kuhaon man sa ubang sibyaanan.

Dili na lang nako tagsa-tagsaon paghisgot kinsa ang among mga kauban sa DYLA nga anaa na karon sa ubang radyo ug TV stations, samtang ang uban nagsuwat usab sa newspapers.

Nakadawat diay og text message ang akong secretary nga para nako. Nangutana kini kabahin sa armas.

Dili na lang nako ibatbat dinhi sa lindog ha, kay "confidential" ang buot ninyo mahibaw-an. Tawga lang ang cellphone sa akong secretary - 0917-3836645 - ug ingna nga makig-estorya mo nako bahin sa isyu.

Ayaw na lang sa text kay kapoyan nang akong secretary magsigi og tubag ninyo sa text. Ikaduha, mora'g may pagka confidential ang inyong gipakisayran nako mao nga ipaagi ta kini sa sekreto.

Sama sa gihimo ni Randy, mi-text siya. Gipatawag nako apan kay wala man siya'y direct line, nagpa-load tawon siya nako aron ako'y motawag niya para masayod siya unsay lagda kabahin sa pagdala sa iyang armas.

Basta kabahin sa armas (Firearms law) tug-anan ko kamo kon kanus-a nga mahimong dad-on ug gamiton nimo ang inyong armas. Apan ayaw kalimot, kon duna mo'y armas, pagtoon tawon unsaon ang tukma nga paggamit ha?