Judge Ingles ehemplo

Tuguti ko ninyo nga akong daygon dinhi sa Renbor Patrol ang usa sa mga huwes dinhi sa Sugbo nga hilabihan ka paspas nga mohusay sa mga kaso nga gipiyal kanila.

Angay g'yod nga si Regional Trial Court judge Gabriel Ingles hatagan og pasidungog tungod sa paspas niya nga paghusay sa mga kaso, bisan og duna pa siya'y laing sala nga gidumala.

Gawas sa RTC branch 58 nga gidumala ni judge Ingles, siya pa maoy pairing judge sa RTC branch 11, human ang huwes niini gi-promote pagka associate justice sa Court of Appeals.

Halos matag adlaw, o kaha katulo sa usa ka semana nga duna g'yoy kaso nga ma-promulgate si judge Ingles. Sa buntag ra ang iyang husay sa Branch 58 kay sa hapon, adto man siya sa Branch 11.

Kini unta maoy angay'ng sundon sa ubang huwes. Pero baya na man kining ubang huwes, tan-awon nimo sa calendar of cases, daghan tuod nga mga promulgation apan dili mahinayon.

Ang rason nga dili mahinayon mao nga wala pa makompleto pagbuhat ang disisyon. Kini maoy panag-ingnon "Kafait."

* * *

Awhagon usab diay nako ang kadagkoan sa mga huwes diha sa Palace of Justice.

Palihug tabangi tawon ang mga gwardya nga sakop sa usa ka security agency nga nagbantay sa Palace of Justice building.

Mireklamo intawon sila nga usa ka buwan na nga wala sila masweldohi. Gawas ana, ang ilang ahensya wala pa gayod mo-remit sa Social Security System sa kwarta nga giiban gikan sa ilang sweldo.

Palihug RTC executive judge Simeon Dumdom, tabangi ang mga gwardya. Pait kaayo uy, unsay ilang gastohon nga wala man sila sweldohi.

Misamot og pangaluya ang mga gwardya pagkasayod nila nga ang ilang ahensya miremit lang og tulo ka buwan nga SSS contribution sa miaging tuig nga unta pirmi mang giibanan ang ilang sweldo.

* * *

Gigabaan ang usa ka polis nga nadakpan sa akto nga pagpangilkil.

Daghang polis ang ingon niini og buhat. Tiaw mo, gidakop niya ang usa ka giingong drug pusher nga taga Pasil ug gidala niya sa kampo Sotero Cabahug kagahapon sa kaadlawon.

Gipatawag niya ang asawa sa tawo nga iyang gidakop, unya gipangayoan og P40,000 isip bugti kuno sa kagawasan. Gusto ra ba niya nga bayad dayon.

Miduol ang asawa sa mga ahente sa National Bureau of Investigation ug gipahigayon ang entrapment operations nga misangpot sa pagkasikop sa maong polis sulod sa usa ka fast food sa Gorordo.

Sa laktud, ang maong matang sa polis angay nga dili na pasayloon.

* * *

Maayo kay nalimpyo na g'yod kagahapon ang palibot sa Magellan's Cross sa mga tindera nga diha kaniadto maninda sa maong dapit.

Kinahanglan g'yod nga limpyohan ang maong dapit gikan sa mga naninda kay samok tan-awon.

Kwentahon nato kon hain ang mas bug-at, ang pila ka tawo nga nakabinipisyo pagpaninda, o kaha ang tibuok dakbayan nga masaway sa mga langyaw kay wala matagad ang Magellan's Cross park.

Tourist attraction ang maong dapit kay ang Magellan's Cross nalakip sa kasaysayan sa Pilipinas sanglit ang maong cross giingon nga maoy gidala ni Fernando Magallanes gikan sa España ug giugbok sa maong dapit.

Ang dapit nga giugbokan sa cross baybayon pa kaniadto ug giingon nga diha midunggo si Fernando Magallanes, ang giila usab nga si Ferdinand Magellan.