Naaksidente kuno

Karong panahona, midagsang ang lainlaing matang sa binuang. Adunay pangilad nga may kuwarta nga mahitaya. Apan aduna usay pangilad nga walay kwarta nga mahitaya pero makahatag gihapon og kahasol sa hingtungdan. Bisan hain niining duha ka matang sa pagpangilad dili gayod maayo.

Usa ka magbabasa niining lindog mi-text kanako aron pagsumbong sa iyang kasinatian. Ang iyang text nagkanayon:

"Please, hatagig pagtagad kining grabe gyod nga pagpangilad sa mga tawo nga walay puangod. Ala una sa udto nakadawat kami og tawag nga nagpakitabang. Naligsan daw siya sa motorsiklo. Ang ako daw tong papa. Siya ra man naay motor. Labihan namong kulbaa niadtong higayona. Paadtoon daw mi sa Cebu Doctor's ug padalhon og kwarta. Busa nagdali mig ilis ug nagdala nag kuwarta. Pero niuna mi og suta sa girabahoan sa akong papa. Pero dako namong katingala kay didto ra man siya sa iyang gitrabahoan ug okey ra ang iyang kahimtang. Karon lang gyod kini nahitabo." - 0906-9291013 (Nov. 23, 2005--14:03:56)

Daghan salamat sa imong text. Kining imong kasinatian tinuod nga makapabalaka alang kaninyo. Tiaw ba nga may mokalit lang og panawag og magpahibalo nga may sakop sa inyong banay nga naaksidente? Natural, mag-panic gayod kamo. Natural nga mabalaka gayod kamo.

Kon ang tumong sa nanawag mao ang pag-ilad kaninyo aron makakuwarta, dili ako makaseguro niana. Hinuon, dili kini imposible. Pero ang akong nakita, base sa imong gisaysay pinaagi sa text, morag gusto lang gayod sa nanawag kaninyo nga matugaw kamo. Wala tingaliy laing trabaho kadtong tawhana kondili ang pagpang-disturbo sa iyang isigkatawo.

Sakto ang inyong gibuhat nga nagsusi una kamo sa gitrabahoan sa imong Papa. Kon wala pa kini ninyo buhata, hayan nahinayak kamog adto sa Cebu Doc. Ang ako lang ikasulti mao nga dili maayo kadtong gihimo sa nanawag kaninyo. Kon pananglit may masakiton diha sa inyo ug ma-shock sa maong hitabo, peligro kon atakehon kini inigkadawat sa maong kasayoran.

Para nako, pangilad gihapon kadto (bisan pananglit walay tumong ang nangilad sa pagpanguwarta). Pagbantay kamo niini.

* * *

Sa laing bahin: Sir, naay leakage sa tubo sa tubig diri sa Teguis,Poro, Cebu. Nganong wa man magtagad ang mga opisyal niini? Wala ba sila makakita nga usik kaayo ang tubig? Magdanaw gyod. Nakahatag kinig kalisod sa mga motorista sa pag-agi kay magbasa ug maglapok ang karsada." - 0927-3693481

Manghinaot kita nga inigkapatik niining imong reklamo, nasulbad na kanang leakage sa tubig diha sa inyo sa Teguis, Poro, Cebu.

(Sumbong ug reklamo? Text sa 0910-8105522)