Lupon gipasagdan na

Nindot kaayo nga dunay panagtigum sa tanang sakop sa Lupong Tagapamayapa sa 80 ka barangay dinhi sa dakbayan sa Sugbo karong Pebrero 18.

Maayo unta og makatambong ko sa maong kalihukan, ilabi na og dunay mga refresher course sa maong kalihukan aron nga matudloan ang mga sakop sa Lupon og dugang kinaadman sa pagsulbad sa kaso.

Nasayod ko nga daghang mga sakop sa Lupon ang wala kaayo masayod sa mga balaod nga magamit unta nila sa pagsulbad sa mga panagbangi sa mga lumulopyo diha sa ilang barangay.

Ang tinuod, sakop ko sa Lupong Tagapamayapa sa barangay Lorega-San Miguel. Bisan dili ko abogado apan nagbasa ko og mga balaod og nagamit nako kini sa pagsulbad sa mga kaso nga akong nahuptan.

Samtang nagpakabana ang kadagkoan sa dakbayan, ilabi na sa presidente sa Association of Barangay Councils nga mapahigayon ang Congress sa mga sakop sa Lupon, awhagon nako siya nga asikasohon ang "city share" sa Oktobre, Nobiyembre ug Disyembre.

Nakadungog ko og report nga gipasuspenso kuno sa City Hall ang paghatag og honorarium ngadto sa mga sakop sa Lupon. Maayo na man lang god to unta nga "makapalipay-lipay" sa mga sakop sa Lupon.

Sama sa amo sa Lorega-San Miguel, tag P100 ra ang among honorarium matag buwan. Kon may city share, maayo na lang unta kay duna man ta'y mapaabot.

Dasigon usab nako si Konsehal Eugenio "Jingjing" Faelnar nga mopasiugda pa og dugang kalihukan ingon man paghatag og incentive sa mga sakop sa Lupong Tagapamayapa.

Unya, kadtong mga kauban nako nga Lupon sa lainlaing barangay, dasigon usab nako nga mosalmot g'yod sa mga kalihukan nga magtudlo kanila og dugang abilidad sa pagsulbad sa mga panagsungi sa mga lumulopyo sa inyong barangay.

* * *

Bisan og mag-unsa pa pagpanakop ang mga tinugyanan sa balaod sa mga babaye nga maghubo atubangan sa ilang customers ug niadtong malambigit og "paid sex" dili gayod mahunong ang maong kalihukan.

Bilib ko sa lakang sa National Bureau of Investigation kay ang ilang gipasakaan og kaso mao ra ang "Mama Sang" sa 17 ka batan-ong mga babaye ug ang tag-iya sa bar nga anaa mahimutang sa eskena Pelaez ug Colon.

Ang Celebrity Disco Bar gibisitahan sa mga NBI agents kaniadtong miaging gabii og gisikop nila ang 17 ka "guest relations officers" kay gituohan nga gipahimuslan sila sa ilang "Mama Sang."

Matud ni NBI regional Director Medardo Delemos nga si Sally Demoral maoy midawat sa gibayad sa mga ahente sa NBI nga nagpatoo nga customers.

Wala g'yod mamakak si Demoral nga nakadawat siya og kwarta gikan sa mga ahente sa NBI nga gustong modala sa usa ka GRO ngadto sa private room.

Apan ang GRO hinoon miingon nga wala kini magpasabot nga pakighilawas ang ilang gikasabotan human sa pagdawat sa maong kantidad.

Gawas ni Sally Demoral, ang registered owner sa maong bar nga si Emelia Getaruelas Poster ilakip usab sa pagpasaka og kaso nga paglapas sa Republic Act 9208, ang anti-trafficking in persons act.

* * *

Nakabantay ko nga ang mga report nga gipadala kanako - pinaagi sa cellphone sa akong secretary - kuwang og mga detalyi. Sa laktud, dili nako magamit.

Dihang mireport nga kusog ang pamaligya og shabu diha sa usa ka barangay sa Naga, apan dihang gisukna sa akong secretary kon kinsa ang maong mga pusher, wala makatubag.

Ayoha palihug ang inyong report ug ipadala sa 0917-3836645.