Ok ra ang namaligyag kandila?

Dunay gamay'ng kontrobersiya nga namugna ang desisyon sa dakbayan sa Sugbo sa pagpapahawa sa mga sidewalk vendor diha sa Magellan's Cross Park isip kabahin sa pagpanindot sa maong dapit. Alang sa turismo.

Usa ka 93 anyos nga lumolupyo ning atong dakbayan -- kinsa nagdumili sa pagtugot kanato nga ibutyag ang iyang pangalan -- mipadayag sa iyang hunahuna kabahin niining lakang nga himoon sa City Hall.

Matud niya, maanindot kon mahawanan ang maong parke sa mga sidewalk vendor, ilabi na kadtong dunay mga batang naglago lang og nagsamok-samok sa mga turista.

Apan matud niya -- ug dinhi miinsister siya -- nga dili hilabtan ang lehitimong mga mamaligyaay og kandila. Suma pa niya, kining mga tiguwang namaligyag kandila nahimo na'g tipik ug kabahin sa bag-ong kasaysayan (recent history) sa Cross ni Magellan.

Labot pa, puno pa niya, nahimo nausab sila nga kabahin sa Cross isip talan-awon sa mga turista.