Pangilad sa Junrex

Duha nalang kaadlaw Pasko na, siguradong kasagaran nato nakadawat na sa atong 13th month pay, ang uban posibling duna pay bonus ug uban pang mga kaayohan gikan sa ilang tagsa tagsa ka mga kompaniya.

Atol sa Pasko, di kalikayan nga ang atong mga gipaabot nga madawat duna nay gitagan-an, ang uban ipalit ug bisan unsa nalang. Apan sagad gyud gustong mopalit og bag-ong cellphone karong panahona. Mao nang kon mosud ka sa mga cellphone shop hilabihang punoa gyud.

Pero duna koy pahimangno alang niadtong gusto nga mopalit og cellphone, pilia gyud og maayo ang mga shop nga inyong palitan kay basin mabiktima mo sa mga mangingilad nga mga tindahan sama sa nahitabo nako.

Niadtong miaging Domingo mipalit ko og bag-ong cellphone didto sa Junrex Cell Shop diha sud sa usa ka higanteng mall sa north reclamation area. Brand new ang maong unit sigun sa tindera sa maong shop, apan sa dihang akong gisusi ang mga features niini pag-abot nako sa balay akong nasuta nga ang unit nga akong napalit second hand.

Nahibong ko kay duna nay mga voice recordings ang cell phone nga akong napalit nga unta bag-o man kini matud pa sa tindera. Akong giuli ang unit pagka ugma aron pailisan og bag-o apan ang tindira miingon nga wa na kuno silay unit nga sama sa akong napalit.

Giingnan ko sa tindera nga mangita og laing unit apan mas mahal ang mga unit nga ilang gihatag nako. Dunay susama og model sa akong gipalit apan matud nila nga mas mahal ni kay dunay warranty. Akong giingnan ang tindera ug ang opisyal sa tindahan nga didto niadtong higayona nga ang unit lang ang akong gusto ug di ko mangayo og warranty card apan padayon sila nga nagdumili pag-ilis sa unit.

Gisaaran nuon ko sa tindahan nga karong adlawa ilang ilisan ang akong unit. Pero bisan pa og ilisan nila ang unit nga akong napalit wa ni makapapas sa ilang tulobagon sa ilang klarong pagpangilad.

Usa ka pagpangilad ang gihimo sa JUNREX cell shop nga ipatuong brand new ang unit nga ilang gibaligya apan diay ginamit. Maayo sigurong lili-on sa mga opisyal sa Department of Trade and Industry ang maong anomaliya tungod kay luoy ang customer nga makapalit sa ilang baligya.

Ang labing tinuod dugay nakong nakadawat og mga reklamo batok sa maong shop apan wa ko motuo niini hangtud nga ako mismo nahimo nilang biktima.

* * *

Di layo ang posibilidad nga tinuod ang pasangil sa anak sa usa sa mga minero nga namatay human mataboni ug carbon sud sa tunnel sa Ibalong Resources and Development Corporation didto sa lungsod sa Dalaguete nga gisubornohan sa ilang kompaniya ang mga opisyal sa Department of Energy aron lugakan ang inspection sa ilang mining site.

Si Alejandro Sanchez, anak sa usa sa mga namatay, mitug-an nga daghang mga inspectors sa DOE ang kanunay nga moduaw didto sa ilang gitrabahoan apan di gyud kini mosusi sa tunnel kon luwas ba alang sa mga trabahanti.

Matud ni Sanchez nga way hustong safety measures nga gipatuman ang ilang kompaniya hinungdan nga nahitabo ang trahedya. Makasabot hinuon ko nga posibling bunga lang sab sa kasubo ug kasuko sa pamilya tungod sa kalangan sa pag-ugkat sa mga natabonan nga mga minero ang maong pasangil.

Apan mas maayo gyud nga dunay imbistigasyon nga himuon niini tungod kay dili kumedya ang maong pasangil sanglit posibling daghan pa nga mga kinabuhi ang makalas kon ugaling duna gyuy pagpasagad sa mga opisyal sa DOE tungod kay nakadawat og suborno.

Alang nako mas maayo gani nga isuspenso una ang operasyon sa maong mina hangtud nga masiguro na gyud ang kaluwasan sa mga trabahante niini. Sa pikas bahin husto hinuon si Mayor Ronald Allan Cesante nga unya na sila mohimo og imbestigasyon human maugkat ug mapahimutang sa lubnganan ang mga nakalas sa trahedya.

* * *

E-mail: [email protected]