Garci: State witness!

Mao kini ang sugyot, dili sa oposisyon, kon dili gikan ni Sen. Miriam Santiago. Kini, matud pa niya, aron pagkulitog gyud sa kamatuoran.

Sa ato pa, mamahayag si Garci, under oath, aron iyang itug-an ang tinuod. Protektahan siya sa gobiyerno batok niadtong dili gustong mogimaw ang truth.

Sa atong pagsuwat niini, waa ta masayod kon unsay latest development. Kon mosugot ba si Garci o dili. Apan alang nako, bisag di sila maminaw nako, kay kinsa man ko, maayo gyud nga ma-state witness si Garci, dili aron pagprotiher ni bisan kinsa, kondili, alang sa kamatuoran ug alang sa nasud.

Pong pa ni General Gudani, loyalty first to God, then to country ... and last to people. Sa ato pa, kon mag-conflict ang interest sa kamatuoran ug sa tawo, kinahanglan atong ipatigbabaw ang kamatuoran, bisag masakitan ang tawo, kay lagi truth hurts man.

Ang tanan mo-claim nga nangita sila sa kamatuoran. Diha unta koy higayon nga atong makaplagan, apan, di man gusto ang House of Representatives bisag mogimaw lag gamay ang kamatuoran, pinaagi unta to sa Impeachment proceedings.

Karon, niay laing higayon nga ma-utingkay ang kamatuoran. Ug kini pinaagi lang ni Garcia. Kon mosugot si Garci, nga mamahimo siyang state witness, makaayo kini sa atong Presidente, aron once and for all, mamatud-an nga sayop ang oposisyon sa ilang giakusar nga gitikas ang miaging presidential election.

Usa sa mga puntos nga buot ipalutaw ni Miriam mao ang tubag sa mga pangutana kon unsay mga unod sa ilang cellfon conversation ... kon kini aron ba pag-protect sa ka-sagrado sa balota, o aron ba pag-desecrate niini.

Everybody is seeking for the Truth. Kinahanglang motabang ang NBI, ang Kasundalohan ug Kapolisan, ang tanang Senador ug tanang Representante, ang tanang cabinet secretary, ug ang tanang gobernador ug mayor, pagpaguwa sa kamatuoran. Sa laktod kitang tanan. Siyarog di gyud mogawas ang kamatuoran. Apan, kon duna say maningkamot pagtago niini, Diyos na lay mag-igo nato, Dro!