Espoko mo na nga ang eskwelahan nga gipaestahan sa mga tinun-an nga gikan sa lainlaing tunghaan sa dakbayan sa Sugbo mao ang Awihao National High School nga nahimutang sa barangay Awihao.
Layo-layo g'yod ang maong lugar ug nahimutang kini sa bukid na nga bahin kay ang plete god sa tricycle tag P13 na. Ang habal-habal mas mahal og gamay kay wala man kini ma-regulate sa kagamhanan, busa sabot-sabot ra ang bayad.
Apan sa laktud, kaming mga Cebu delegation wala magmahay, ug hinoon nalipay kaayo nga didto kami gipaestar. Nasabtan namo nga ang kadagkoan sa DepEd Toledo City division mipili sa Awihao Elementary School nga maoy among estahan kay nindot ang maong tunghaan.
Gawas nga nindot ang maong tunghaan, limpyo, kompleto sa koral, dunay gwardya, giabagan pa sa mga kugihan nga tanod, maabi-abihon pa ang mga maestra ug ang principal nga si Victoria Alquiza.
Ang mga boy scouts sa maong tunghaan, kaadlawon pa nga maghakut og tubig aron ikaligo sa mga bisita - mga tinun-an, mga coach ingon man sa pipila ka ginikanan - nga miuban sa ilang mga anak.
Ang maong tunghaan, duna sa'y canteen nga gidumala usab sa maabi-abihon kaayong maestra nga kon magpaluto ka'g kinaham nimong pagkaon, ila g'yod nga buhaton. Barato pa g'yod ang presyo.
Sa laktud, kaming taga dakbayan sa Sugbo nga nakaestar sa maong tunghaan, pulos gayod nagpasalamat sa ilang kamaabi-abihon.
Magpasalamat usab mi ni Sir Macky Mendres, maestro sa Toledo City Vocational School, kay bisan og nanirado na siya sa iyang gamay'ng tindahan nga adunay Karaoke, gipatay niya ang iyang kaduka.
Si Sir Macky ug ang iyang pinanggang asawa, mahinangpon gihapon nga miabi-abi namo ni Doktor Flordeliza Sambrano ug Doktor Joan Serafin, nga nanganta sa iyang video karaoke.
Basta kay ang among nasinati sa tulo lang ka adlaw nga pag-estar namo sa Awihao, nakapahimuot kaayo namo nga taga dakbayan.
Ang akong tinun-an, si Princess Rene Pearl M. Borromeo - ubos sa pagtudlo ni Sir Nestor Arandia - maoy nakakuha sa ikaupat nga dapit sa Copy-Reading category sa elementary level. Kapin sa 2,000 ka tinun-an gikan sa tibuok Central Visayas ang misalmot sa maong kompetisyon. Si Princess ra maoy nakadaug sa mga tinun-an sa Zapatera Elementary School (Science Class) - sa maong journalism contest.
Reklamo ang mga kusinero kay nahulagway nila nga pwerteng inita sa ilang kahimtang nga walay "proper ventilation" ang ilang kusina. Kon may sunog kuno, peligro sila kay wala man kini'y tarong nga entrance.
Unya, init kaayo ang maong kusina. Palihug kuno mga sakop sa fire inspection team, susiha ang reklamo sa maong mga kawani sa Ocean Jet. Unya, kamo sab nga mga opisyal sa Ocean Jet, tagda ang ilang reklamo.