Modus sa simbahan

Mga suki, nasayod na kita kon unsa nga mga simbahan dinhi sa dakbayan ug lalawigan sa Sugbo nga gidugok kada adlaw sa daghang mga tawo. Bantayanan kaayo kini tungod kay dili ang tanang mga tawo nga imong makita sa sulod o sa palibot sa simbahan mga malinis og konsensiya. Adunay daghang daotan og kalag nga anaa diha ug nagpaniid lang sa mga tawo nga buot nilang biktimahon.

May nagsumbong nako nga diha sa Basilica del Sto. Niño ug ingon man didto sa may Opon Church, naay daghang mga mangunguot nga mag-atang sa gawas-sa may entrance -- paingon sa sulod sa tugkaran sa Simbahan. Abtik kaayo silag kamot kay dili gayod makamatikod ang ilang makuotan.

Ang estilo mao nga maniid sila sa palibot. Kon magtinagsok na gani ang mga tawo nga buot mosulod sa simbahan, anhi na niining higayona sila molihok. Monunot sila sa mamaligyaay og kandela nga mosugat sa mga manimbahay. Dili gyod makabantay ang ilang biktimahon.

Usahay sab dili sila mosugat sa mga manimbahay, monunot sila sa mga tawo nga magpunsisok paingon sa sulod sa simbahan. Sa higayon nga naghuot na, anha na nila ipasalir ang ilang tinonto. Mohinok silag panguot sa bolsa sa tawo nga ilang masundan aron pagkuha sa pitaka niini. Ablihan usab nila ang mga bag aron kuhaon ang mga valuables sa sulod niini sama sa alahas, cellphone ug uban pa.

Bantayanan kaayo kining mga tawhana. Busa sa inyong pagsulod sa simbahan, ayaw pagkompiyansa aron dili kamo mabiktima. Usahay usab, anha sila mopahigayon sa pagpanguot kon makalingkod na sa lingkoranan ang ilang prospective victim. Mopasumangil silag luhod sa luyo sa ilang prospect ug kon makahigayon, manguot dayon. Daghan na ang nabiktima niini nila.

Kon anaa kamo sulod sa simbahan, ayaw ibutang sa inyong kilid ang inyong bag kay sayon ra kining mahilabtan sa mangunguot nga posibleng anaa sa inyong luyo. Aron pagseguro nga luwas sa peligro, anha ipahimutang ang inyong bag sa inyong atubangan aron pagseguro nga inyo kining mabantayan kanunay.

Sa inyong pagpangalawat, ayaw biyai ang inyong mga bag nga walay nagbantay. Lisod na karong panahona. Tingalig sa imong pagbalik sa imong gilingkoran, wala na didto ang imong bag kay gisibat na sa kiriwan og kamot. Mao nga dili gayod angay nga mokompiyansa bisan sa sulod sa simbahan.

* * *

Sumbong ug reklamo? Text sa 0910-8105522)