ANG DIOS MIINGON...Ang Tawag sa Adbiyento

Naandan na gyud nato nga mangandam kon dunay bisita nga moabot. Ang kanhiay kalandrakas natong balay mokalit lang og kahapsay. Mga mahalong plato og mga kutsara, mga unlan ug habol magawas gyud diha-diha. Magkara-kara kita diha-diha labina kon sa wa lang palandonga moabot ang wala paabutang bisita. Duhay paingnan ani. It's either maglagot o mahinangop. Maglagot kay wala man mahabig ang budget. Mahinangop tungod sa unexpected visit.

Adbiyento na usab. Laing tuig alang sa simbahan ug karon mao gyud ang Unang Domingo sa Adbiyento. Ang Adbiyento nagkahulogan literally of Pag-abot. (Gikan sa latin nga pulong: Adventus). Sa atong Simbahan, mao kini ang panahon sa dili pa ang Pasko sa Pagkatawo sa atong Ginoo. Kay sa Adbiyento man gud, atong gipangandaman and duha ka mga pag-abot sa atong Ginoo. Ang una, diha sa paghinumdom sa iyang Unang pag-abot diha sa iyang Pagkahimugso ingon nga tawo ug sama kanato. Ang Ikaduha, mao nga atong gipaabot sab ang Ikaduhang Pag-anhi ni Jesu-Cristo ingon nga Hari diha sa Himaya diin iyang pagahukman ang tanan sibo sa ilang mga binuhatan.

Ning mga panahona, gidapit kita nga magmaigmaton samtang nagpaabot kita nga malaumon sa Pagbalik ni Cristo atong manunubos. Matang sa pagkamaigmaton nga naga sukad diha sa usa ka mapalandongong mga pagtidlum sa mga panghitabo sa atong palibot karon. Tinuod, daghan na ang mga dayan-dayan sa Pasko ug nadungog na nato ang mga huni. Apan kini silang tanan, mga panggawas lamang nga mga pangandam. Dili sila ang unod aron mahingpit ang pagpangandam. Angayan natong andamon ang atong kaugalingon. Angayan natong i-evaluate ang atong mga nabuhat sulod sa milabay'ng tuig liturhiko. Ug usa na niini mao ang paghinulsol sa atong mga sala. Kon ingon ani lang unta ang himuon sa kadaghanan, dili tingali magpabiling haguka ang atong nasud. Alang kanako, kini mao ang tawag sa Adbiyento ug dili ang usa ka passive ug sterile nga pagpaabot kanus-a matapos ang kalibutan.