Patonto mos masyaw?

Bisan og layo-layo pa ang pasko, apan daghan nang mga mananaygon nga magsuroy-suroy sa lainlaing kabalayan sa pangindahay nga sila makatigum og salapi nga dinaygonan.

Dunay gikan sa mga lagyong dapit sa kalungsuran nga motuyo lang gayod sa pag-anhi sa dakbayan aron manaygon sa mga tagbalay.

Angkonon nako nga kapoyan kaayo ko sa ubang mga mananaygon kay daw sa usa ra kabook kanta ang ilang nakamaohan.

Tambag nako sa mga mananaygon nga aron daghan ang ganahan nga mohatag kaninyo og sensiyo, ayaw balik-balika ang inyong mga kanta.

Daghan ko og nabantayan nga ang gikanta nila sa ubang kabalayan, mao ra gihapon ang ilang kantahon kon motapon na sila sa kasikbit nga kabalayan. Dili ba puol kaayong paminawon?

Naa pay kanta sa uban nga usa ra g'yod intawo'y tuno, kanang mga kanta nga nagwawog-wawog ang tuno. Bitaw, lainlaina ninyo ang inyong mga kanta aron ganahan ang tawo nga motakilid ug dayon mokuot og kwarta.

* * *

Unya, kamong mga mananaygon, ayaw kalimot nga ang dakbayan adunay ordinansa nga naglatid nga ang pagpanaygon kinahanglang dili makatugaw sa pagkatulog sa katawhan.

Timan-i nga kon adunay moreklamo, mahimo kamo nga dakpon basi sa city ordinance nga naglatid nga lapas sa alas dies sa gabii, gidili na ang pagpanaygon.

* * *

Ang akong tigpaniid sa Bogo ug San Remigio, mikontak nako kagahapon og miingon nga daghan sa mga tigpusta og masyaw didto sa ilang dapit ang nabalaka nga gibulgar nato ang binuang sa mga tigpasiugda sa maong illegal nga sugal.

Basin kuno og tungod sa pagtuki nato sa isyu, ang tighatag nila og mga tip sa modaug nga numero, dili na mohatag kanila.

Hay, pastilan. Ayaw na intawon kamo patonto uy. Akong balikon nga buhat-buhat ra ang numero nga padag-on nila. May nangutana hinoon nako kon ngano nga mihunong na man si Koronel Vicente Loot sa paghimo'g kampanya batok sa illegal nga sugal sa kalungsuran.

Sigi, hisgutan nato kini sa atong lindog ugmang adlawa. Ako usab nga kontakon ang akong higalang koronel.

* * *

Pahimuslan nako ang paghatag og dakung pagyukbo ngadto sa mga utokan nga tinun-an sa grade-6 (Science Class) sa Zapatera Elementary School.

Sila ra maoy mga tinun-an sa publiko nga elementary school dinhi sa dakbayan sa Sugbo nga midaug sa elimination sa pagahimoong Metro Quiz final karong Sabado anha sa Metro Ayala.

Ang laing mga tinun-an nga ilang ikasangka karong Sabado nagagikan sa tulo ka pribadong tunghaan sama sa Sacred Heart School for Boys, Sacred Heart School for Girls ug University of San Carlos for Girls.

Dinhi maila nga ang kalantip sa pangutok sa mga tinun-an usahay dili magdepende sa tunghaan asa sila mag-eskwela. Diha hinoon sa Science Class, daw sa dili usab bentahaan kay advance ang ilang mga leksyon nga ikatandi usab sa mga pribadong tunghaan.

Ang maong mga tinun-an sa Grade 6 (Science Class) sa Zapatera Elementary School nga apil sa Metro Quiz, apil usab sa regional press conference sa mga tinun-an gikan sa lainlaing dapit sa Central Visayas nga adto pagahimoa sa dakbayan sa Toledo karong umaabot Lunes, Martes ug Miyerkules.

Sa maong kalihukan, ang mga tinun-an sa grade 6 nga gikan sa lainlaing tunghaan sa Central Visayas, magtigi sa pagsuwat og mga balita, straight news, feature writing, photography, editorial writing, copy editing, headline writing ug uban pa.

Atua ko sa dakbayan sa Toledo atol sa maong kalihukan aron maniid sa pagpahigayon sa maong regional press conference sa mga tinun-an.