Music, kagahapon ug karon

Palubad ta, maghisgot tag music, mga awit, mga kanta, kagahapon ug karon.

Mga alas 10 na to sa kagabhion. Naghigda na ko. Enjoy kaayo kog paminaw sa mga songs nila ni Matt Monroe ug Andy Williams. Waa naka kaila ini nila Dro.

Ug sa hapit nako mahinanok, kaylagi, gidaug nako sa katulogon gumikan sa mananoyng mga awit sa among panahon, nikalit og badlong ang akong anak lalake, pag-ingon, "Sabaa ana Dy uy!"

Buot ipasabot nga bisan kon hinay unta kaayo ang volume, unya, waa gyud mo-siyagit sila si Matt ug Andy, gisabaan ang batan-ong nakong anak. Ngano man ni, Dro? Unsa may nasulod sa ulo sa ato karong generation?

Ngano man nga sa mga mananoyng mga awit, puno pa sa kahulogan ang mga wordings, ngano nga sabaan man sila? Ug sa ila karong mga tugtog nga singgit dinhi singgit didto, singka dinhi singka didto, manglagpot pa ang atuli sa atong dunggan, di pa masabot ang mga lyrics, ngano man nga di man sila sabaan? Hilom man kaayo ni alang nila? Mao ni sila ang hope of the fatherland ni Rizal?

Unya, samtang malipay unta ta nga lakip ang mga local talents, mga Sugboanon talents, aduna say kaugalingong mga version nga ikatandi sad sa taga-Manila, apan, unsa man ning ilang mga composition, mga law-ay sad kaayo, mga vulgar, mga bastos. Mao ni ang ilang halad ngadto sa ilang isigka-batan-on?

Naunsa na man lagi ta ini? Dro? Asa na man ta ini paingon? Kon di na ta mosalig sa mga adults, kay medyo na-corrupted na, unya, maayong pagka-pollute ang atong mga batan-on, unsa may dangatan sa Pilipinhong kaliwat?

Pagka-alaut ug pagka-dimalas sa atong mga bayani, mga veterano patayg buhi nga mi-ula di lang sa ilang mga singot kondili, dugo gyud, alang sa atong nasud. Ikaw, Dro, komusta imong mga anak?