Sa siyudad sa Sugbo, si Mayor Tomas Osmeña mipasangil kang Konsehal Jocelyn Pesquera nga nag-mayor-mayor tungod sa paglangay-langay og pasar sa ordinansa alang sa alarm system sa dakbayan.
Sa dihang nagyawyaw na si Tomas sa iyang mga press conference, na-pressure ang konseho hangtod napasar ang ordinansa, naapil pa ang P10 milyones nga budget alang sa kampanya batok sa bird flu.
Natarantar na si Tomas karon unsaon niya pagputol sa pako sa mga miyembro sa konseho nga gusto nang mosungag kaniya sa umaabot eleksiyon.
May migawas man gud nga balita nga si Bise Mayor Michael Rama nagpanikad nang modagan pagka-mayor atbang ni Tomas. Si Pesquera ang iyang bise-mayor.
Dili lang kay Sugbo ra ang hikutaron ni Tomas sa umaabot eleksiyon. Gusto usab niyang makuha ang Talisay pinaagi sa pagpadagan og iyang tawo, pinaagi ni Konsehal Gabriel Leyson, pagka-mayor. Anak ni Lito Osmeña nga usa ka batan-ong doktor gibalitang gustong modagan pagka-kongresista sa unang distrito.
Natimahoan na karon sa mga tigpaniid sa Mandaue nga gusto ni Carlo nga mag-mayor o ba kaha bise mayor. Katapusan naman karon nga termino ni Mayor Thadeo Ouano ug ni Bise Mayor Amadeo Seno Jr.
Tan-awa unsay iyang gibuhat. Iyang gibabagan ang resolusyon nga magtugot ni Teddy pagsulod og kontrata alang sa pag-abang sa mga Nissan Terrano nga himuong patrol car sa kapolisan sa dakbayan.
Bisan nasayod na si Carlo unsa kagamit ang patrol car pagpatunhay sa kahusay ug kalinaw sa usa ka lugar, nakaako pa gyud siya sa pagkuwestiyon sa resolusyon.
Niadtong gi-ambush ang negosyanteng si Wilson Yu, wala madakpi sa kapolisan ang mamumuno nga naka-motorsiklo tungod sa kakulang sa kahimanan sa transportasyon.
Namatud-an niadtong miaging semana nga gamit kaayo ang Nissan Terrano nga giabangan sa siyudad sa dihang gi-ambush ang laing negosyante. Dali kaayong nadakpan ang mamumuno sa kapolisan nga migukod kaniya gamit ang Nissan Terrano.
Karon nga naprobahan na unsa ka gamit ang Nissan Terrano, dili na hinuon gusto ni Carlo ug sa ubang mga konsehal nga mi-apil-apil sa pagbabag nga adunay patrol car ang siyudad.
Nagduda ko niining mga miyembro sa konseho sa Mandaue nga dili gustong ma-'equipped' ang kapolisan sa ilang kinahanglan pagpatunhay sa kalinaw sa dakbayan.
O tuyo lang gyud nila ang klarong pamolitika.
Samtang walay sayop niini tungod sa kamahinangpon nato sa demokrasya, apan kun may bulok politika na ang pagbabagbabag, ang publiko na ang naalot niini.
Unya na unta kanang politika ini'g sugod na gyud og paminaho sa eleksiyon.
Ang maayong buhaton nilang Carlo ug Joy Pesquera ang pagseguro nga dili mabiya ang panginahanglanon sa katawhan, ilabi na sa natad sa seguridad nga maoy tataw'ng kulang sa tagsatagsa nila ka hurisdiksiyon.
Adunay balita nga atong nadawat nga adunay dakong salapi nga nalambigit sa maong smear job nga tua magtuyok sa Manila.
Ang maong salapi gigamit isip "funding" aron pagdaot ug pagduot ni Mangaoang sa tuyo nga mapalagpot kini sa Port of Cebu.
Gipasanginlan sa mga tigpaniid sa adwana si Manila Deputy Customs Collector for Assessment Grace Karingal. Si Karingal ug si Customs - Enforcement and Security Service Director Nestorio Gualberto adunay dakong plano pag-ilog sa Port of Cebu gikan ni Mangaoang.
Paita, unsa kahay giilogan?