Taktika sa money changer

Mga suki, makadaghan na nato hisgoti dinhi ang mahitungod sa nagkadaiyang modus operandi sa mga money changer. Apan aniay bag-ong modus nga posibleng pipila pa lang ang nasayod niini.

Malagmit wala pay nahitabo nga ingon niini dinhi sa dakbayan sa Sugbo. Pero didto sa Metro Manila midagsang na kini pag-ayo. Daghan na ang nabiktima niining maong tinonto mao nga kinahanglang magbantay ang tanan.

Ang estilo mao nga kon ikaw magpailis og dolyar sa usa ka money changer, buladahon kag maayo sa tig-alagad niini. Bisan unsa lang ang iyang isulti kanimo aron ka malipat ug dili makabantay sa pagahimuon niyang binuang.

Sa imong atubangan iyang iphon ang kuwarta (salaping Pilipinhon) nga iyang iilis sa imong dollar. Sa iyang pag-ihap, sakto pa ang kantidad niini. Apan mahibulong ka na lang kay kon ikaw nay mag-ihap, kulang na kini. Kon ikaw na ang mag-ihap, mobiya siya sa imong atubangan ug magpalayo.

Kon moreklamo ka nga kulang, ikaw na hinuon ang pasanginlan nga maoy nanikas. Nga kuno imong gitagoan ang ubang kuwarta sa dihang mibiya siya ug nagpalayo kanimo. Pastilang paita! Ikaw pa nabiktima, ikaw pa ang napasanginlan nga nanglimbong. Grabeha, no?

Mangisog pa gayod ang tig-alagad sa money changer. Makiglalis siya kanimo. Nga kuno nakakita ka man nga husto ang kantidad nga iyang giilis sa imong dollar nga diha gayod niya ipha sa imong atubangan. Mao nga may gamay sab siyang lusot. Mao nga daghan gayod ang nabiktima niini.

Apan giunsa man kini pagkalaki sa money changer? Unsa man ang taktika nga nagpaluyo niining maong tinonto?

Ang estilo mao diay nga sa higayon nga gunitan na niya ang bantal sa salapi sa iyang mga kamot, iya kining iphon nga magsugod sa kinaibabwan nga kuwarta. Ang paagi sa iyang pag-ihap dili itagsatagsa pagbutang sa lamesa o kaha counter ang matag papel nga maihap kondili lugpitan lang sa iyang mga kamot.

Human sa maong pag-ihap, sublion kini niya pag-ihap nga ang kuwarta nga nahimutang sa kinailawoman mao na usay unahon pag-ihap paingon sa kinaibabwan, Unya, samtang nagpadayon sa pag-ihap, walay kasayoran ang nagpailis nga ang kamot sa nag-ihap hilom diay nga milugpit og pipila ka papel (kuwarta) sa ilawom nga bahin ug ihulog sa iyang tiilan.

Apan sa tan-aw sa nagpailis, sakto ang kantidad sa kuwarta. Dayon ihatag na kini sa tig-alagad ngadto sa nagpailis.

Sumbong ug reklamo? Text sa 0910-8105522)