Sweldo pa umentohan

Dakung supak si mayor Tomas Osmeña nga adunay ipatuman nga usbaw sa sweldo sa mga kawani tungod kay iyang gihulagway nga makapasamot kini sa unemployment problem.

Sa unang higayon pagkadungog nako niini, naglibog ko. Apan akong nasabtan nga ang iyang baruganan gibasi nga kon paumentohan ang sweldo sa mga kawani, posible nga daghang mga tag-iya og balay-patigayon nga manaktak og kawani, o kaha manirado sa ilang negosyo.

Gawas pa niini, gilantaw usab sa mayor nga kadtong mga wala pay trabaho sa pagka karon makuli na nga makakita og trabaho kay hayan molimit na man sa mga trabahador ang mga magpapatigayon aron dili makagasto og daku.

Husto baya usab ang baruganan sa mayor. Apan lisud man god kon ang gamay'ng sweldo sa mga trabahador dili paumentohan karong panahona.

Kaniadtong miaging gabii, nagpalit ko og liquefied petroleum gas nga kaniadto mapalit lang sa tag P466 ang 12 kilos. Abi ninyo? Diriyot ko matuk-i kay ang presyo sa maong LPG miabot na og P519 sa usa ka gasoline station diha sa eskena McArthur boulevard ug T. Padilla Ext.

Kahilakon ko nga naghuna-huna. Klaro kaayo nga ang akong budget dili na makaabot sa sunod nga tingsweldo. Pun-an pa kon duna kay sakop sa pamilya nga masakit, tabla ka ra og giihian sa iro nga gidemalas.

Gawas sa mga LPG, ang bayranan nato sa koryente ug tubig mosaka pa g'yod. Pletehan, gipetisyonan na usab nga pausbawan gikan sa P6 nga minimum ngadto na sa P7.

Kami nga mga motorista, dili tuod kami makaplete og mahal, apan dia mi ig-a sa mahal kaayong kantidad sa gasoline nga sensiyo na la'y kuwang aron motangkod nga P40 ang litro. Ang krudo gani, P34 na ang litro.

Sa laktud, pwerte g'yod nga paita sa kahimtang sa katawhan.

* * *

Si kongresista Antonio Cuenco adunay plano nga mosugyot siya og usbaw sa sweldo sa mga kawani nga katumbas sa 25 porsiento sa mga minimum wage.

Maayo kaayo ang maong plano ni Cuenco kay kon kini mahinayon, nagpasabot nga dinhi sa Sugbo mausbawan kita og bali'g P55 ang adlaw. Kon imong kwentahon sa usa ka buwan, mausbawan kita og P1,650.

Apan ang pangutana mao kini. Makaya kaha sa mga magpapatigayon ang paghatag og usbaw sa ilang mga kawani? Wala kaha'y posibilidad nga manaktak na lang sila og mga kawani aron nga mominus ang ilang sweldohan?

Aw, hinoon, dili man ikalimod nga sa usa ka trabahoan, duna man g'yoy mga ligoy. Sila maoy angay nga taktakon sa serbisyo.

Daghang mga balaudnon nga napasaka na sa kongreso nga nangayo og dugang usbaw sa suholan sa mga kawani. Kini maoy rason nga si Cuenco dili na mopasaka og balaudnon apan iya na lang isugyot unya sa pagtuki sa maong balaudnon nga ang ipausbaw nga sweldo, bali'g 25 porsiento.

* * *

Unsa kaha'y epekto aning padayong pagmahal sa presyo sa mga palaliton no? Nagtoo ko nga daghan g'yod sa katawhan ang moagwanta na lang nga maglugaw-lugaw.

Ako gani, usahay magtughong na man lang ko sa buntag para makadaginot. Nasayod ko nga wala kamo makaila og tinughong, pangutana lang mo sa uban.

Basta kay kanunay ko nga gituki kining maong problema sa mga kabus, sanglit usa ako ka kabus.