Bahin gihapon saJadewell

Usa ka higayon niana nahipatik dinhi sa akong lindog ang bahin sa reklamo sa usa ka texter mahitungod sa Jadewell Mktg. Towing Service. Karon ania na usay laing reklamo bahin gihapon sa Jadewell nga akong hatagan sa pagtagad.

Akong ipasabot nga wala nako kondenaha ang Jadewell kay wala akoy katungod sa paghimo niana. Labaw nang wala ako mangatake kanila. Apan sanglit may gipadangat man nga sumbong ug reklamo diri kanako, ako lang kining ipagawas dinhi sa akong lindog sa pamasin nga pinaagi niini makaabot ngadto sa hingtungdan ang reklamo. Ang sulat-reklamo gipadala sa akong e-mail address nga [email protected]. Ang reklamo nagkanayon:

Dear Orie,

Niay akong ipahibalo nga modus sa Jadewell Mktg. Towing Service. Kini sila ang official Towing Service sa Mandaue City. Ang procedure unta ini nila usa mo-tow og sakyanan, maghuwat usa unta sila og sort of job order gikan sa kadagkoan sa Tedman nga maoy awtorisado pag-issue og citation ticket unya mo-request nila nga dunay ipaguyod nga sakyanan usa sila moguyod.

Ang nahitabo kay segun sa akong nadunggan kay nabiktima man ang akong sakyanan nga gidala sa akong mekaniko unya naaberiya sa may FF Cruz sa North Reclamation sa Mandaue City, pero diha intawon sa barangay road, dili main road unya nadaot sad og usa pa wala makabalda sa trapiko kay barangay road lagi, pero bisag giunsa og hangyo sa akong mekaniko nga huwaton lang ko kay nagpalit man ko og pisa wa gyod mosugot, giguyod gyod. Mao to kay diha na man sa ilang yarda obligado na gyod tawon ko sa paglukat, pero wa lagi moagi og TEDMAN, nikobra og P500. Pag-ingon nako nga hain man ang Citation sa TEDMAN giingnan ko nga kon moagi pa og TEDMAN P1,500 na ang akong bayranan. Unya nakadungog ang akong mekaniko sa mga crew nga nag-estoryahay niingon kuno nga duha na lang ang kulang kuha na kuno ang kota kay naa kuno silay porsiyento sa mga sakyanan nga maguyod nila.

Mao ni nga gisulti ko ni nimo kay sa akong nahibaloan sa ordinansa dili sila makaguyod og way permiso sa TEDMAN. Dili ba modus operandi man ni? Hinaot nga imo ning i-publish aron makorehian ning ilang mga binuang. Salamat daan. -- Nile Quinn, Tel. no. 420-3157"

Daghang salamat sa imong e-mail. Dili lang una ko mokomentaryo niining imong gisumbong. Ang ako lang ikasulti mao nga kon gilapas man sa Jadewell ang ordinansa sa Mandaue kalabot sa towing ug ang standard operating procedure sa pagpahigayon niini, klarong gihanigan kinig binuang. Pero aron patas ang tanan, akong paaboton nga mo-explain ang Jadewell sa ilang habig dinhi sa akong kolum. Bukas akong e-mail address sa ilang pagpasabot sa ilang habig.

Sumbong ug reklamo? Text sa 0910-8105522):