EDITORYAL – Mag snap election nasab ta?

Tungod kay napakyas ang mga lider sa oposisyon sa pagtangtang kang Presidente Gloria Arroyo pinaagi sa impeachment, mga dinagkong protesta sa kadalanan, mga gitawag nilang prayer march, ug uban pang kalaki, gusto napod nila nga ipahigayon ang snap election.

Segurado gyud sila nga kun dunay snap election ug moapil si Mrs. Arroyo pildihon kini sa ilang kandidato sa maong piniliay.

Apan mahimo ba kining snap election ning panahona? Di na lang ta mohisgut og mga legalities kabahin niining butanga. Hisgutan ta lang ang pundo o kuwarta nga gikinahanglan alang niining maong ehersisyo elektoral.

Nag-ukon-ukon pa man gani ang gobiyerno sa pagpahigayon sa piniliay sa barangay ug gisibug pa man gani kini ngadtos 2007 kay way pundo alang niini. Unsa pa kaha ang national snap presidential election? Nagkinahanglan kini og mas dakong kuwarta kay sa eleksiyon sa barangay.

Matud pa sa usa ka kanhi sakop sa Commission on Elections (Comelec), dako gyud nga kuwarta ang gikinahanglan sa paghimog snap election kun gusto kitang maayo gayud ang pagpadagan sa maong kalihukan elektoral.

"Ang kuwartang gamiton sa snap election mahimo pa nga gamiton sa ubang butang diin nagkinahanglan og immediate funding," ang maong ex-Comelec official nagkanayon (sa Tinagalog diin atong gihubad sa Binisaya).

Naa say laing kanhi opisyal sa kagamhanan nga nag-ingon: "Di nalang ta mag-snap election. Usik lang. Kun modaug si Arroyo, ingnon man dayon sa oposisyon nga nanikas. Ug vice versa."

So snap election, anyone? Hala pangitag kuwarta alang niini.