Malakas na lindol

Malakas na lindol ang biglang tumama
Sa bansang Pakistan at karatig-bansa;
Walang warning warning ito’y naminsala
At maraming buhay ang biglang nawala!

Maraming gusali mababa’t mataas
Lahat ay gumuho – lahat ay napatag;
Pagkain at hayop ay naglahong ganap
Kinain ng lupa’t naparam na lahat!

Ganitong sakuna’y di maiiwasan
Pagka’t ito’y dulot nitong kalikasan;
Sakuna rin itong di napaghandaan
Pagka’t dumarating ng bigla-biglaan!

Ang lindol ay lubhang napakahiwaga
Dumarating ito kahi’t saang bansa;
Kumikilos ito nang lihim sa madla
Doon sa ilalim -— sa vortex ng lupa!

Kaya tayong mga nasa Pilipinas
Sa Poong Maykapal dapat pasalamat;
Pasalamat tayo -— ang lindol umiwas
Sa malayong bansa ay doon naganap!

Kung dito tumama lindol na naturan,
Itong bansa nati’y lalo pang gagapang;
Hirap na hirap na sa mga awayan
Tiyak sa relief goods ay mag-uunahan!

At tumpak din naming tayong Pilipino
Sa mga nilindol makiisa tayo;
Pagtulong at dasal kasama ng mundo
Sa mga naligtas sa lindol ng siglo!

Kung iisipin mo’y ganito talaga
Ang mabuhay ngayon kahi’t walang g’yera;
Sa lindol at bagyo’y nagiging salanta
Mga mamamayang lumimot sa Kanya!