Mangunguot ug tulisan

Usa sa labing lisod dakpon karong panahona mao kining mga mangunguot ug tulisan nga anha mopasalir sa ilang tinonto sa sulod sa PUJ. Daghang mga badlongon sa katilingban ang naghimo niini busa ayaw gayod kamo pagkompiyansa sa inyong pagpanakay og PUJ. Pagbantay kamo batok sa inyong kaubang pasahero nga makapaduda ang mga lihok kay basin mangunguot kana o tulisan ba kaha.

Gibaha na ako sa daghang mga sumbong ug reklamo gikan sa mga magbabasa nga nabiktima sa tinonto. Atong hatagan og luna dinhi niining lindog ang ilang mga text sa pamasin nga kini kapanaminan sa uban. Timan-i, ang mga pasahero sa PUJ usa sa kinaham nga biktimahon sa mga badlongon.

0917-2415125: "Naay mga mangunguot sa PUJ nga biyahe Lapu-Lapu-Mandaue. Usa ka tomboy ug tulo ka lalaki. Diha sila sakay sa PUJ sa eskina Burgos ug AC Cortez Avenue. Cellphone ilang tuyo. Mohulog silag sensilyo."

0917-3236963: "Good day. Misakay mig PUJ para Inayawan gikan sa Colon. Pag-abot sa eskina J.M. Basa dihay upat ka tawo nga nipara. Gitulis ming mga pasahero. Maoy ilang biktimahon ang mga pasahero sa PUJ nga rota og Inayawan."

0915-2019092: "Nauso na pod karon ang panguot og bag sa jeep. Duha ka lalaki ang naghimo niini. Ang usa batan-on, 20-30 ang edad. Ang usa tigulang na, mga 40-50 ang edad. Mga pasahero sa jeep padulog SM ilang biktimahon. Dili mamatikdan ang daotan nilang tuyo. Paita, nisiaw na sad!"

0917-3000166: "Daghang mangunguot sa PUJ labina na sa jeepney stop. Usahay daghan kana sila. Kon asa ang daghan nga manakayay, naa pod na sila labina kon ting-uwan. Pitaka ug cellphone ang ilang tuyo."

0917-3283615: "Naay mangunguot sa jeepney padulong Talamban. Duha sila ka tawo.Ang ilang modus mao ang pagdala og knapsack nga klaro kaayo nga walay sulod. Ang usa kanila mohulog og sensilyo."

Timan-i gyod ninyo, mga suki, nga kasagaran sa mga mangunguot sa PUJ mao ang mga sakop sa Laglag-Barya Gang. Basta may sensilyong ihulog sa inyong tungod samtang kamo nagsakay, ayaw gayod ninyo kana punita. Pasagdi kana. Hinuon pagbantay sa imong katupad kay basin mao kana siya ang mangunguot.

Timan-i usab ninyo kining mga rota nga gibutyag sa atong mga texters diin sagad nato mamiktima ang mga badlongon sa katilingban. Kon mosakay kamog PUJ sa maong mga rota, ayaw gayod kamog kompiyansa. Ayaw mog salig nga may nangadakpan na kanila kay makagawas ra man usab sila dayon.

* * *

(Sumbong ug reklamo? Text sa 0910-8105522)