Modus sa buwangan

Nasayod na kita nga ang buwangan mao ang dapit diin mag-abot ang mga sugarol nga mahiligon sa cockfighting. Sagad nga maggahob ang buwangan sa adlaw'ng Domingo. Aduna usay mga badlongon sa sulod sa buwangan. Adunay mamago o dili motahan (bayad) kon mapilde. Aduna usay motraydor ug adto mopusta sa pikas o sa manok nga kontra sa hiniktan nga iya kunohay nga gidapigan.

Kini maoy pipila lamang sa mga modus operandi sa sulod sa buwangan. Gawas niini, ang mga mamuwangay dili usab luwas gikan sa mga mangunguot. Kay sulod sa buwangan, posibleng anaa usab ang mga mangunguot nga maoy itayming sa pagpanguot sa higayon nga gilargahan ug naglabok na ang duha ka manok nga tinarian sulod sa ruydahan. Niini gong higayona, ang atensiyon sa mga tawo adto na sa manok o mga manok nga naglabok. Busa dili na sila makamatikod sa suspek nga mihinok sa pagkuot sa bolsa sa ilang karsones aron pagkuha sa ilang pitaka.

Dili kay kana ra, mga suki. May nag-text kanako kalabot sa usa ka partikular nga binuang sulod sa buwangan. Ang texter mihangyo nga dili lang ibutyag ang iyang numero alang sa iyang seguridad. Ang iyang gi-text kanako dinhi mismo nahitabo sa dakbayan sa Sugbo.

* * *

Ang iyang text nagkanayon: "Good day. Seguro nakatultol o ba kaha nakasulod ka na sa buwangan sa Carlok. Matag Domingo, kadaghan na ako makasaksi og binuang ug ang ako gyod mismong kuyog ang nahitaboan. Sa taas nga lugar sa buwangan, naa dapit sa may hagdanan, naa diha tanan ang mga mangunguot ug mamago (pago) kon sila mapilde. Daghan kana sila. Gikaengkuwentro na kana namo sila makausa ka higayon. Sayon ra kaayo kanang dakpon. Suheto na ko nila. Maayong masumpo kana sila diha. Sayon ra kaayo ang pag-ila nila. Magpagawas lang ka sa tinibuok nimong kuwarta sama sa tag P1,000.00 ug tag P500.00. Inigkataudtaod, matingala ka na lang kay gisikitan ka na og tulo ka tawo. Usahay upat pa ang mosikit nimo. Ang usa nila maoy magmaneho sa pagkuot sa imong bolsa nga mismo ikaw dili makabantay. Naa pa gyoy laing modus diha sa maong buwangan. Kusog sad kaayo ang peke nga tag P500.00 ug P100.00 diha." -- 0926-Withheld

* * *

Sumbong ug reklamo? Text sa 0910-8105522)