Daghang nalipay

Daghang nalipay sa desisyon ni RTC Judge Soliver Peras nga buksan ang Cebu South Coastal Road sa South Reclamation Project.

Dako og kahasol ang nahatag sa pagsirado sa maong proyekto ngadto sa mga motorista. Ang kahasol nahatag ngadto sa mga residente sa habagatan nga manganhi sa siyudad ug ang mga taga siyudad nga mangadto sa habagatan.

Sa ato pa, wala nay bili ang SRP pass nga gipang-isyu sa Cebu City Hall.

Angayang tumanon sa mga opisyal sa dakbayan ang mando sa korte nga pagbukas og balik sa coastal road ngadto sa mga motorista.

Panguhaon na kanang nga barikadang gipamutang aron makalahoslahos na ang mga motorista. I-pull out na usab kanang mga Barangay Intelligence Network (BIN) nga maoy mosita sa mga motorista nga moagi sa coastal road nga walay pases gikan sa Cebu City Hall.

Ang kagamhanan sa Sugbo aduna pay daghang "remedy" ilawom sa balaod.

Si OIC City Attorney Rodolfo Golez nagkanayon kagahapon sa interbiyu sa usa ka estasyonan sa radyo nga mahimo silang mo-aplay og temporary restraining order (TRO) aron mababagan ang pagpatuman sa desisyon sa korte.

Ang desisyon ni Peras mahimong i-apelar ngadto sa Court of Appeals.

Miyentras wala pay TRO o bisan unsang mando sa korte ibabaw sa desisyon ni Peras, maayong tumanon sa kagamhanan sa siyudad ang pagbukas sa SRP, kun dili mag-atubang sila og kasong contempt.

* * *

IHAW. Ang City Veterinary Office mirekomendar sa konseho sa dakbayan nga pamahalan ang pagpaningil sa bayad sa ihaw.

Kadtong magpa-ihaw og karne paninglan na og 181 ngadto sa 186 porsiyento nga usbaw sa slaughter fee.

Aduna kaha kini dautang idulot sa mga kunsomedor og karne?

Sa akong tan-aw, aduna.

Dili lalison sa mga negosyante og karne ang mahimo unyang desisyon sa kagamhanan sa dakbayan. Kun pilay ipabayad nila pagpa-ihaw og karne, mobayad lamang sila sa walay kusmod.

Apan, kitang mga kunsomedor maoy magbaguod kay ang resulta niana, adto ihapak sa presyo sa karne matag kilo ang ilang mabayad sa pagpa-ihaw.

Mao ra usab kini sa nahilom nga expanded value added tax (VAT), kun ipatuman dili alkanse ang mga negosyante nga adto man ihapak sa mga konsumedor ang buhis, sa ato pa, kita ra gihapon ang mag-antus.

Tuyo sa veterinary office nga mapatas-an ang pundo sa kagamhanan alang sa mga proyekto.

Apan wala hunahunaa ni Dra. Alice Utlang nga ang mga kunsomedor maoy maboktot sa iyang nahunahunaan nga bag-ong eskema sa slaughter fee.

Mao kini ang nakadaot nianang mga tawo sa gobyerno. Mopatuman og mga programa nga dili gani i-agi og makuting pagtuon unsang sangputan.

Imbes naglisud na ang mga tawo tungod sa kawalay trabaho o kun may trabaho man, barato ang suweldo, pun-an pa gyud nianang mga programa sa kagamhanan nga mahimong makapa-ut-ot og samot sa mga kunsomedor.

Hunahunaa intawon na ninyo!