Pirated softwares

Tinuod, kon pakubsan sa mga manufacturers ug dealers ang presyo sa ibaligya nila nga mga computer softwares mao kini ang makagiya nga mapuo na ang mga pagpanghimo og mga pirated nga softwares.

Tukma ang awhag ni Konsehal Edgardo Labella nga paminosan g'yod ang presyo sa mga softwares aron madani ang mga negosyante nga motuman na gayod sa balaod nga mogamit ra og mga orihinal nga computer software.

Tungod god sa kamahal sa presyo sa mga orihinal nga computer softwares nga gibaligya sa tag P7,000 ngadto sa P9,000 daghan ang mohukom na lang nga morisgo sa paggamit og mga pirated nga gamay ra man sila og magasto.

Usa ka suod nakong higala nga ang trabaho mao ang pag-install og mga computers sa lainlaing opisina, mitug-an nga ang mga pirated nga computer softwares mapalit ra gani sa tag P150 ngadto sa P300. Kadtong mga computer softwares nga nasakmit sa National Bureau of Investigation (NBI) gikan sa usa ka American national ug sa iyang Filipino business partner, barato ra ang kantidad niadto.

Apan kon kwentahon nimo ug ibasi sa orihinal nga presyo moabot gayod og P9 milyones. Sigurado ko nga kon susihon gayod sa NBI ang lainlaing mga balay-patigayon, daghang computer nga masakpan nga pirated ang softwares.

Bisan sa mga buhatan sa kagamhanan. Sa City Hall kaniadto akong nabulgar nga ang ubang computer nga gibaligya kanila sa mga nakadaug sa subasta mga pirated ang softwares.

Ang mga tigbaligya og computer kon imo kining rondahon ang ilang mga tindahan, sigurado ko nga daghang masakmit tungod kay kon mangutana ka kanila moingon man dayon " unsay imo branded o pirated lang."

Usa ka ilado kaayo nga distributor og mga computer dinhi sa dakbayan nga mitanyag nako og presyo nga P39,250 sa branded nga computer set, apan giingnan ko niya nga madala ra og P22,000 basta pirated ang softwares.

Kadtong mga mopalit og computer nga wala masayod, mahibaw-an nimo kon orihinal ang softwares nga anaa sa imong computer kay hatagan ka nila og mora'g libro nga Certificate of Authenticity nga gikan sa Microsoft Company ug sa ubang mga computer manufacturers.

* * *

Hangtud kagahapon, wala pa mokontak nako si SPO1 Rene Batulan, usa ka polis nga nadistino sa 703rd provincial mobile force nga nagbase sa barangay Don Andres Soriano sa dakbayan sa Toledo.

Kay wala man ko'y kontak nimo SPO1 Batulan, anhi lang nako ipaagi ang pagpahibalo nga nangita ko nimo Ngay.

Nangutana ko sa akong secretary, wala pa g'yoy SPO1 Batulan nga mikontak sa iyang cellphone. Usbon nako, ang iyang cellphone numbers 0917-3836645.

Sa gihapon, nagrespito pa ko nimo SPO1 Batulan mao nga gihuwat g'yod nako nga mokontak ka nako. Pahibaw-on tika daan nga dunay mireklamo nimo og buot ko ikaw nga kuhaan og pamahayag.

Mahimo ra usab nga dili ka motubag apan kon tinguha nimo nga motubag, daku nakong kalipay ang pagdawat sa imong pagpasabot. Okey ba SPO1 Batulan?

* * *

Ugmang adlawa, mahawan na g'yod kuno ang aseras gikan sa eskena Leon Kilat ug Colon paingon na sa eskena Colon ug P. Lopez.

Sa laktud, lisod kaayo suroyan ang atong downtown area sa pagka karon kay nahisama na lang sa Carbon market tungod sa daghang mga sidewalk vendors.