Modus sa alahas

Usa sa labing bantayanan karong panahona mao ang mga badlongon sa katilingban nga magdala og mini (peke) nga alahas. Maoy kasagarang biktimahon niining maong mga suspek kadtong mga tawo nga nagbaton og mahalon nga mga alahas.

Ang estilo mao nga maglaroylaroy sa siyudad ang mga suspek aron pagpangita og biktimahon. Mangita silag mga tawo nga may dalang mga alahas o kaha nagsul-ob og mga alahas. Kasagaran sa ilang nabiktima mao ang mga estudyante.

Sa higayon nga may makita na silang prospek, ila kining sundan sa hilom ug panid-an. Kon makakita na silag tukmang tayming, ila kining duolon ug tanyagan sa dala nilang mini nga mga alahas. Nindot sab ang maong mga alahas ug sa una pa lang nga pagtan-aw, makaingon ka gayod nga genuine kini.

Sagad duha ka suspek ang maghimo niini. Silang duha ang magbanosbanos sa pagpakigsulti ngadto sa ilang prospek. Ilang gipatuo ngadto niini nga ang dala nilang alahas mas taas pa og kalidad kay sa alahas nga gisul-ob niini.

Unya, usa sa mga suspek moawhag sa prospek sa pagtangtang o paghubo sa gisul-ob niining alahas kay iya kunong tan-awon. Kon mosanong ang prospek, nahasulod na siya sa laang. Nag-ungaw na siya sa kakuyaw.

Sa higayon nga atua na sa mga kamot sa suspek ang alahas sa prospek, ang suspek mokuha sa iyang kahimanan sa pagtunaw sa maong alahas. Natural, makalitan ang prospek. Tingali mohana og kasuko. Pero abtik nga mopakalma ang mga suspek. Ila kining buladahon ug ilisan ang gitunaw niining alahas sa dala nilang alahas.

Ang prospek walay mahimo gawas sa pagdawat sa gitanyag. Unsaon pa man niya nga natunaw na man ang kaugalingon niyang alahas. Gawas pa, sa tan-aw niya morag mahalon nga white gold ang alahas sa mga prospek nga ihatag kaniya. Mao nga modawat na lang siya sa maong alahas.

Ulahi na niyang madiskubrehan nga peke diay ang mga alahas nga gihatag sa mga suspek kaniya isip baylo sa iyang alahas nga gitunaw. Apan asa man niya pangitaa ang mga suspek? Kutob na lang siya sa pagdangop sa mga awtoridad aron pagsumbong sa iyang pagkailad.

Pagbantay kamo niining maong estilo sa modus operandi. May nabiktima na niini didto sa Tagbilaran City dili pa lang dugay. Ang mga suspek nagdalag peke nga mga alahas ug mga paraphernalyas sa pagtunaw sa mga alahas. Sa higayon nga may alahas na silang matunaw, ilang bayloan ang maong alahas og mini nga alahas.

Nagtuo kong kining maong modus operandi posibleng makaabot usab sa Cebu. Mao nga angay kamong magbantay. Sa higayon nga makasugat kamog tawo nga ang approach sama sa atong gikaasoy sa unahan, ayaw kamog kompiyansa.

Sumbong ug reklamo? Text sa 0910-8105522)