Ang Dios Miingon...Dress to kill?

Niadtong SPY's er pa ko, nakasilbi ko og Misa sa Kasal nga espesyal. DIli kaayo daghan ang nanimba apan ang nakadani sa akong pagtagad (tingali, ang pagtagad pud sa uban), mao ang usa ka babaye nga mibasa sa maong Misa. Ang gisul-ob niya haskang muboa! Matataw naman hinuon ang iyang paa nga daw mas bus-ok pa kay sa kaber nga dumaga. Daw buyog ang mga manimbahay nga naghinunghongay apil ang pari nga nagmisa nga igo lang naglingo-lingo tungod sa maong salida.

Dili particular ang Dios sa imong bisti apan diha unta sa Misa, ato pud unta kining hatagan og igong kadesente. Kini tungod kay ang nagdapit kanato alang sa usa ka bangkite dili lang kay si GMA kondili ang Dios na gyud mismo diha sa Eukaristiya. Mag-dress to kill man gani si Dodong kon mobisita na sa iyang uyab. Kon desente wala magpasabot nga kini mahalon og branded. Hinunoa, kanang sapot nga nagtimaan og pagrespeto sa nagdapit inay ang indirect nga insulto. Kay matud pa, ang atong gisul-ob nagtimaan pud sa atong dakong pagtagad sa atong gibisita. Kon importante ba siya alang nimo o dili ba.

Bisan pa man nga walay pagpinig ang Gingharian sa Dios, apan wala kini magpasabot og paghatag og minimal nga dili sa maong kamatuoran. Kay gidapit man kita nga tugob sa pagmahal sa atong Ginoo, angayan man tingali, nga mogahin gyud kita og Pagtahod diha sa pagpakita og Kaikag!

Kon ang mensahe sa pagtahod atong gipadayag pinaagi diha sa atong mga sapot nga gitudlo nan, mas labaw na gyud ang atong kahiladman lakip na niini ang atong pagbati, kinaiya, og panlantaw. Kay ang Eukaristiya ra ba dili lang ritwal, hinunoa kabahin gyud sa atong kinabuhi. Ug kay kabahin man, angay lamang nga ato kining himoong priority dili lang sa ritwal kondili diha gyud mismo sa atong makanunayong pag-awat sa makabuhing mensahe niini: Gugma, Hustisya, og Pag-Inambitay.