Emergency kuno

Mga suki, aniay talagsaong modus operandi sa mga mangingilad nga delikado kaayo. Kinahanglang magbantay kamo niini aron dili kamo mabiktima. Bigtime kining maong sistema sa pangilad sa mga badlongon sa katilingban.

Maoy kasagaran nga biktimahon sa maong mga mangingilad ang mga asawa kang kansang bana nagtrabaho sa layong dapit o abroad. Nasayod man god sila nga dinagkong kuwarta gayod ang ilang makuha.

Ang estilo mao nga adunay manawag sa prospek nga magpailang kauban sa trabaho sa iyang bana. Magpahibalo kini kaniya nga adunay daotang nahitabo sa iyang bana. Emergency kuno kaayo. Nahilandig (kuno) ang bana sa prospek sa tambalanan ug talandogon kaayo ang kahimtang.

Natural nga mag-panic gayod ang prospek nga asawa. Magkara-kara. Dili na mahinultol sa angay buhaton tungod sa kahingawa ug kabalaka. Maguol gayod pag-ayo. Dili masabot ang gibati sa prospek.

Niining tungora, ang nanawag nga suspek moingon nga makig-coordinate lang ang prospek ngadto sa doktor nga maoy nag-atiman sa iyang bana. May ngalan sa doktor ug contact number niini nga ihatag ang suspek ngadto sa prospek.

Tuod man, tungod sa gibating kabalisa, ang asawa nga prospek dili na makahunahuna sa pagtawag sa cellphone sa iyang bana. Mao nay iyang sundon ang tanang instruksiyon sa suspek kaniya. Manawag siya sa contact number sa giingong doktor nga maoy nag-atiman sa iyang bana.

Tuod man, ikasulti niya ang doktor (kuno). Mangayo dayon kini og dakong kantidad--linibo--isip downpayment alang sa tambal sa iyang bana. Ipadeposito lang sa usa ka partikular nga bank account o ipadala pinaagi sa computerized ug labing daling paagi sa pagpadala og kuwarta karong panahona.

Sa tinguhang maluwas ang iyang bana, ang inosenteng asawa motuman sa instruksiyon. Mopadala siyag kuwarta. Ulahi na siyang makamatngon nga nailad siya. May nahitabo na niini didto sa Alburquerque, Bohol dili pa lang dugay.

Usa ka asawa og seaman ang gibiktima sa mga mangingilad. Usa ka adlaw niana may tawo nga nanawag kaniya sa telepono ug nagpaila nga usa ka Capt. Cagusa nga nagpahibalo kaniya nga ang iyang bana nga nagtrabaho sa barko gidunggab sa chiefmate. Nakugang pag-ayo ang asawa sa nadawat nga balita.

Giingnan siya ni Capt. Cagusa nga makig-coordinate sa usa ka Dr. Villanueva. Gihinabi sa asawa ang giingong doktor. Gipangayoan siya niinig P60,000.00 isip pasiunang bayad sa tambal sa iyang bana. Iyang gipadala ang kuwarta sa Western Union.

* * *

Sumbong ug reklamo? Text sa 0910-8105522)