Mga fixers

Tungod lagi sa pagdagsang sa mga fixers ug illegal recruiters nga nakabiktima na sa daghan natong kaigsuonan, gimugna ang Presidential Anti-Illegal Recruitment Task Force nga gipangulohan ni Director Reynaldo Jaylo aron maoy mogukod ug mosumpo sa mga malapason ug mapahimuslanon.

Tinuod nga ang sitwasyon sa ekonomiya sa atong nasod, ang kalisod sa panginabuhi ug kaubos sa suweldo maoy hinungdan nga linibo ka Pilipino ang mamasin nga makatrabaho sa gawas sa atong nasod o sa abroad. Daghan ang napugos sa pagpanimpalad tungod kay daw dili na nila maantos ang kapit-os.

Kinahanglan usab nilang hatagan og makaon ug tubagon ang panginahanglan sa ilang pamilya. Wala silay laing nahunahunaan nga solusyon gawas sa pag-abroad aron dolyares ang ilang kitaon sa pagpanarbaho.

Kini gipahimuslan usab sa mga badlongon sa katilingban. Maoy gihimo nilang estilo sa modus operandi ang pagpatuo ug pagpasalig ngadto sa mga aplikante nga dali rang makalarga ug makatrabaho sa abroad. Ang tinguha nga daling makatrabaho sa gawas sa nasod maoy hinungdan nga daghan ang atong kaigsuonan nga mabiktima ug mahulog sa mga kamot sa daghang illegal recruiters.

Matud pa ni Director Reynaldo Jaylo, mokabat sa 20 ka tawo ang moreklamo sa ilang buhatan adlaw-adlaw tungod kay nabiktima sa illegal recruiters ug mga fixers. Usahay kuno moabot sa 100 ka tawo ang maglinya sa ilang buhatan sa 2nd Floor sa Rizal Memorial sa luyo sa Harrison Plaza, dapit sa may M. Adriatico sa kaulohan.

Usahay gani, ang usa lang ka agency ireklamo sa mokabat sa 25 ngadto sa 50 ka mga biktima. Mao nga angay gayod kamong magbantay. Ayaw pagpakig-transact sa mga fixers ug illegal recruiters aron dili ka mabiktima.

* * *

Sa laing bahin, aniay text nga akong nadawat gikan sa usa ka magbabasa nga nagkanayon: "Good day, Mr. Vallecera. Ako lang isumbong ang bahin sa mga fixer. Dayag na kaayo ang mga fixer diha sa NSO ug bisan sa LTO. Sa NSO sayod ang mga guwardiya, polis ug tanod pero wala gyoy mahimo. Morag apil pod na sila sa modus. Kanang kan-anan sa daplin sa NSO maoy estambayanan sa mga fixers. Kon adunay mo-raid, naa gyoy daghan diha nga makuha nga mga birth certificate. Walay fixer kon walay kakunsabo diha sa sulod. Tag P300.00 man ilang pangayo. Kon tuyoon lang gayod sa pagsikop kanang mga tawhana, dali ra. Gani wala gyoy nagpakabana mao nga wala gyoy paglaom nga moasenso pa ang atong gobiyerno kay daghan kaayong corrupt. Salamat." 0916-7253141

* * *

Sumbong ug reklamo? Text sa 0910-8105522)