Materyalismo

Usa ka rabbi ang gibati og tumang kahingawa sa iyang batan-ong higala nga nalumsan na sa mga kalibutanong mga hilig. Dili na matukib ang pagka-materyalistik niini. Gidapit sa rabbi ang iyang higala ngadto sa iyang lawak og silang duha nanambo sa bintana. "Unsa may imong nakita?" Sukna sa rabbi. "Mga bata nga nanagdula." Unya gikuot sa rabbi ang gamay'ng samin gikan sa iyang bulsa og iya kining gipabantang sa nawong sa iyang batan-ong higala. "Unsa may imong nakita karon?" sukna na pud sa rabbi. Ang batan-on nga niabot og katingala mitubag: "Ang akong kaugalingong nawong." Ang rabbi mipadayon."Dili kana ikatingala. Kay sa matag higayon nga mogilak ang salapi, makalimtan na nimo ang uban og ang imong kaugalingon lamang ang imong gitan-aw."

Pamalandong

Ang kahakog sa mga butang kalibutanon, maoy nakapaaghat sa usa ka tawo nga mamahimong magpalahi og maneguro lamang sa kaugalingon. Inay nga mopaambit, mokumkom naman hinuon pag-ayo. Mas palabihon pa ang salapi kaysa tawhanong dignidad.