Usa sa paboritong biktimahon sa mga mangunguot mao ang mga tawo nga magbarogbarog sa daplin sa dalan aron paghulat og sakyanan. Mahitabo kini sa dapit diin adunay daghang mga tawo nga nagngadto-nganhi sa lainlain nilang katuyoan.
Ang estilo mao nga adunay usa ka lalaki nga moduol sa gibarogan sa prospect. Magpakaaron-ingnon kini nga taga probinsiya ug wala masuheto sa siyudad. Mangutana kini kon haing dapita ang (pananglit) Talamban, Mandaue, Mambaling ug uban pa. Bisan unsa lang nga ngalan sa lugar ang iyang litokon.
Sa higayon nga motubag ang prospek sa pangutana, dili na siya lung-an sa suspek. Magpadayon na kini sa pagpakigsulti kaniya. Daghan na kinig isulti nga masabot nga bulatik lang aron malingaw ang prospek.
Magpadayon gayod sa pagpakigsulti ang suspek ngadto sa prospek. Bisan unsa na lang ang isulti niini. Wala lamay kasayoran ang prospek nga may kauban diay ang suspek nga iyang gikahinabi nga nagbarog sa iyang luyo. Dili siya makamatikod nga gihinay na niinig laslas ang bolsa sa iyang karsones o ba kaha ang iyang bag aron pagkuha sa iyang pitaka, cellphone ug ubang valuables.
Human makuha ang tuyo, mobiya ug mopalayo gilayon ang maong suspek. Samtang ang suspek nga maoy naglingaw sa pagpakig-estorya sa biktima manamilit na usab. Magpasalamat pa kini ngadto sa biktima gumikan (kuno) sa pagtug-an niini sa dapit nga buot adtoon sa naasoy nga suspek.
Ulahi nang makamatngon ang biktima nga nalaslas na ang iyang bolsa sa karsones o bag ug nawagtang na ang iyang pitaka, cellphone ug uban pa. Pagbantay kamo niining maong estilo sa modus operandi.