Haskang biktimaha

Niining bahina sa akong lindog, tugoting akong hatagan og luna kining lain na usab nga text nga akong nadawat gikan sa atong mga magbabasa. Hinaot unta nga ang iyang kasinatian kapanaminan sa uban. Aron dili nila mahiagoman ang sama sa nasinati sa atong texter.

Ang iyang text nagkanayon: "Good day, Sir Uriel. Nabasa nako ang imong lindog nga Modus sa Banat News. Last Friday lang gyod (Agosto 26, 2005) ang akong sister naka-experience sa modus pinaagi sa text. May nag-text niya nga nakadaog kuno siya. Ang cellphone number sa akong sister nga 0928-3421994 mao kunoy nakadaog. Pastilan, nailad gyod mi. Naproblema pa gyod mi, Sir, kay nangutang pa mi kuwarta para sa requirements aron ma-claim ang daog sa akong sister. Haskang biktimaha!" -- 0919-2499785

* * *

Mao gyod kini ang posibleng mahitabo basta mopatol dayon kamo sa mga text message nga inyong madawat nga magpatuo nga nakadaog kamo. Karon gong panahona midagsang na pag-ayo ang text scam. Daghan na ang nabiktima niini busa angay na gayod kamong magbantay kanunay.

Ang akong lindog wala magkulang sa pagpahimangno kaninyo kalabot sa nagkadaiyang modus operandi sa daghan kaayong mga badlongon sa katilingban. Gani, kon bahin sa text scam ang hisgotan, kanunay gayod nato kining gihisgotan dinhi aron lagi masayod ug makabantay ang tanan.

Apan aduna pa diay gihapon ing dili aware sa binuang sa mga badlongon sa katilingban. Hinaot unta nga maleksiyon na kamo niining daghang panghitabo. Hinumdomi kanunay nga lisod gayod nga tuohan nga makadaog ka sa usa ka promo nga wala nimo salmoti. Busa kon may magpatuo kanimo og ingon niini, ayaw kana tuohi.

Ang mga maayong balita nga daw imposibleng matinuod dili gayod angay tuohan. Busa ayaw patonto sa mga mangingilad.

* * *

Sa laing bahin, adunay nag-text nako nga nagpaila nga usa ka estudyante sa usa sa mga tulonghaan dinhi sa dakbayan sa Sugbo. Misumbong siya kanako nga makaluluoy kuno kaayo silang mga estudyante kay wala gayod silay makat-onan.

Unsaon nga talagsa ra man kuno moklase ang ilang mga magtutudlo. Ang ilang maestro ug maestra nagsige lang og atiman sa ilang negosyo.

"Wala intawon kamiy pahulay kay Sabado ug Domingo magklase man mi unya inig-abot namo sa classroom wala ang among teacher kay nagdula og tennis. Imbestigaha kana ninyo," nagkanayon ang texter 0910-6350673 Sumbong ug reklamo? Text sa 0910-8105522)