Nagpakatawa mo da!

Dili na lang maayong tagdon ang isyu nga ipakanselar na kuno sa Camp Crame ang lisensya sa mga tighimo og pabuto diha sa dakbayan sa Lapu-Lapu.

Sayoha nga nagpakatawa sa kadagkoan sa kapolisan uy. Kanselahon kuno nila ang lisensya sa mga tighimo og lainlaing matang sa pabuto kay hangtud karon wala gayod kuno niini tumana ang mga gilatid nga lagda.

Dihang ang Republic Act 7183 gimugna sa sayong bahin sa dekada 90, reporter na ako niadtong higayuna. Mao man gani nga nakaila ko sa mga tawo nga nalambigit niining maong negosyo diha sa barangay Babag II, dakbayan sa Lapu-Lapu.

Nakaila ko kanila, apan wala magpasabot nga tungod kay ang pipila kanila akong kaila, sama nila ni Julian ug Grace Pungasi sa JP Fireworks, molaban ko kon ang ilang mga permit rebokahon sa Camp Crame.

Ang ako lang pangutana, kanus-a man god napatuman sa kapolisan ang mga lagda nga gilatid sa R.A. 7183 ngadto sa mga tighimo og pabuto. Ang inyong gukdon kadto ra ba diay'ng mga tighimo og pabuto nga dunay permit?

Nganong dili man ninyo pangdakpon ang kadaghanan sa mga lumulopyo diha sa Babag ug silingan nga mga barangay nga nanghimo usab og pabuto?

Ang akong sentimento mao kini. Maayo na man lang gani kay kining mga tawhana mikuha og permiso. Tungod niini ang kagamhanan nakakwarta gikan sa mga permit fee nga ilang gibayad.

Dili sila maoy angay nato nga estriktohon kon wala nila matuman ang ubang lagda nga gilatid diha sa balaod. Hinoon, wala malilong kanato ang panultihon nga "Dura lex, sed lex." Nagpasabot kini nga bangis ang balaod, apan wala kita'y mahimo kay mao kini ang balaod.

Kay bangis man ang balaod, kinahanglang ipatuman nato kini ngadto ni bisan kinsa, ma-adunahan man o pobre, aron walay moreklamo nga ang pagpatuman sa balaod adunay pagpinig.

Ang lain nakong argumento mao kini. Kon itandi nimo ang pagpanggama og pabuto ngadto sa pagpanghimo og armas, susama ra ang duha nga pulos illegal. Apan mas grabe ang epekto sa pagpanghimo og armas kay tungod niini daghan ang nangamatay.

* * *

Ang usa nato ka magbabasa sa Renbor Patrol, miawhag na usab ni higalang Jojo dela Victoria nga isip market administrator basin makatabang siya nga mabadlong ang mga tindera diha sa Tres de Abril, habig sa Taboan market nga mipasibog na usab ngadto sa karsada sa pagbutang sa ilang baligya.

Ang akong informer Jo miingon nga ang tag-iya sa tindahan nga gipalapad sa karsada mao sila si Mely ug Boy nga nangangkon nga imong kumpare.

Walay kaso Boy kon managkumpare kamo si Jojo dela Victoria, apan dili maayo kon tinuod man nga nagpalapad kamo sa imong tindahan ngadto na sa karsada.

* * *

Ugma na g'yod diay ang parade sa mga sakop sa media dinhi sa Sugbo isip pagbukas sa Press Freedom week.

Ang parade adto magsugod alas siete sa buntag atubangan sa provincial Capitol building ug mosubay sa Osmeña boulevard, desilya sa P. del Rosario (Land bank) ug demano sa Junquera, dayon desilya na usab sa Sanciangko ug adto mosulod sa UV gym diin adto himoa ang programa.

Unya, inigka-Lunes sa gabii, ang mga sakop sa media dalitan og usa ka makabuhong nga panihapon sa JY Gonzalez and Partners, uban sa Globe Telecom adto sa Waterfront Hotel-Cebu.