EDITORYAL - Paminawon ta ang awhag sa Cardinal

Si Cebu Archbishop Ricardo Cardinal Vidal miawhag sa oposisyon nga ilang dawaton ang resultado sa botasyon diin gibasura sa Ubos Balay Balauranan ang tulo ka impeachment complaints batok ni Presidente Arroyo.

Matud ni Cardinal Vidal panahon na nga ipadaplin ang political differences ug hatagan kahigayonan ang nasud sa pagsibog ngadto sa unahan.

Ang awhag sa Cardinal iyang giluwatan didto sa kaulohan atol sa panagtigum sa Catholic Bishops Conference of the Philippines (CBCP) diin gidiskutir sa mga obispo ang baruganan sa Simbahan labot sa politikanhong krisis.

Ang Cardinal miisyu sa iyang awhag taliwala sa nagpadayong reklamo ug kasaba sa oposisyon kabahin sa ilang kapildihan sa botohay didto sa Kamara Baha adtong miaging Sept. 6.

Nagpadayon usab gihapon ang ilang pagplano kun unsa gayud ang maayo nilang himuon aron maseguro ang pagkahugno ni Presidente Arroyo.

Uyon kami sa baruganan sa atong tinahod nga Cardinal nga hatagan nasad sa oposisyon og kahigayonan nga maka move on ang nasud. Ipadaplin na ang political differences aron masulbad na kining politikanhong krisis nga nakamugna og dakong kadaut sa nasud.

Nanghinaot kami nga paminawon sa mga lider sa oposisyon ang panawagan ni Cardinal Vidal. Husto na ang pagpatigbabaw sa personal political interest. Hatagan nasad natog atensyon ang nasud.