Patubagon gyud si Sgt. Josol

Magpadayon ang pagpanghawod sa mga sakop sa Presidential Security Group (PSG) dinhi sa Sugbo kun dili sulayan sa pagsilot si Staff Sergeant Richard Josol ug ang kauban niining polis nga si PO3 Roque Rañola nga nakaangol sa dihang naaksidente ang gimaneho niining Isuzu Trooper nga hinuwaman gikan ni Cebu Customs District Collector Ma. Lourdes Mangaoang.

Makadaghan nang higayon nga masulod sa insidente dinhi sa Sugbo ang sakop sa PSG. Nahinumdom ko, may photojournalist kaniadtong nadapatan sa sakop sa PSG, adunay nakulatahan.

Pero, wala ko makadungog nga may gisilotan sa unit niining gisakupan.

* * *

PCSO. Si Presidential Assistant for Central Visayas Felix Guanzon daling nakapangayo og ayuda sa Philippine Charity Sweepstakes Office (PCSO) alang sa pagbayad sa pagpatambal sa mga naangol sa disgrasya bunga sa binuhatan ni Sgt. Josol ug PO3 Rañola.

Ang ako man gud, imbes tulobagon ni Sgt. Josol ug PO3 Rañola ang pagpatambal sa ilang mga biktima, gisawo na hinuon kini sa PCSO. Sa ato pa, nalibre na silang Josol ug Rañola sa ilang 'liability' ngadto sa mga tawong naangol tungod sa ilang kabuang.

Kun mao na, okey lang diay kun makasala ang mga sakop sa PSG ngadto sa mga tawo dinhi sa Sugbo, total adunay may PCSO nga mosawo sa ilang tulobagon. Ma-libre man sila sa ilang libality.

Usa pa, hubog silang Josol ug Rañola atol sa insidente ug seguro kong dili "in line of official duty" ang ilang lakaw niadtong tungora.

Ang gibuhat ni Guanzon maisip nga gi-"condone" ang binuhatan nilang Josol ug Rañola nga inay patagmon pinaagi sa pagpahamtang og silot, tabangan na hinuong ma-libre sa ilang tulobagon sa damyos nga ilang nahimo sa komunidad.

* * *

KIHA. Kun akoy usa niadtong mga naangol tungod kay nabanggaan sa gimanehong Isuzu Trooper ni Sgt. Josol, mopasaka ko'g kiha batok sa tag-iya sa sakyanan, bisan og gisawo na sa PCSO ang pagpatambal kanila.

Ang damages nga pangayuon base sa quasi-delict mahimong ipasaka sa mga biktima batok sa tag-iya sa pribadong Isuzu Tooper nga gimaneho ni Sgt. Josol tungod sa doktrina sa balaod nga nag-ingong "ang tulobagon kanunay'ng mosunod sa tag-iya sa sakyanan."

Si Collector Mangaoang, kinsa unang miangkon nga sa Bureau of Customs ang Isuzo Trooper, miangkon na karong bag-o nga iya sa iyang higalang si Ruda Abejuela sa Alabang, Manila ang maong sakyanan.

Bisan hilabihang pagkagubaa sa dulong sa Isuzu Trooper, dili kini depensa sa tag-iya niini kay ang tag-iya kanunay'ng manubag sa damyos nga maangkon sa tawong makasamdan tungod sa iyang sakyanan.

Si Sgt. Rañola nga maoy nagmaneho sa sakyanan mahimong pasakaan og kasong kriminal.

* * *

PETROLYO. Demalas kining tuig 2005. Gihasi og krisis ang Pilipinas ug gi-ulan kita og daghang pagsulay sa kinabuhi.

Usa niini, makapaabot kita nga moabot ngadto sa P50 matag litro ang presyo sa gasolina sa dili pa matapos kining tuig.

Kagahapon, usa ka adlaw sa wala pa ang transport strike karong adlawa, ang mga kompaniya sa petrolyo mipasaka na usab og 50 sentabos matag litro.

Makahihibulong kaayo nganong 50 sentabos gyud matag litro sa matag pasaka nila sa presyo!

Alang nako, oras na nga molihok ang mga magbabalaod batok niining Oil Deregulation Law.

Angayan na nga i-repeal kining balaora kay wala gyud maayong nadulot natong mga Pilipino.

Kini hinuong balaora ang nakahatag og higayon nga makaporma og oil cartel ang mga higanteng kompaniya sa petrolyo nga kanunay'ng magpaklarong nagsabot sa usa'g usa sa higayon nga mopa-usbaw sa presyo sa mga produktong petrolyo, unya 50 sentabos gyud kada usbaw.

Wala baya ko maka-uyon nianang awhag sa mga lider sa gobyerno ngadto sa mga drayber nga angayang hunongon nila ang mga transport strike ug adto sila sa Kongreso mag-lobby aron i-repeal ang Oil Deregulation Law.

Dili na kinahanglan pang mag-lobby sa Kongreso ang mga drayber tungod kay nasayod na ang lehislatura ug ang Malacañang unsa kapait ang nahiaguman karon sa mga Pilipino nunot niining wala mapugnging pagpa-usbaw sa presyo sa petrolyo.

Maayo man gud ning mga karahong anaa sa gobyerno kay libre man ilang sakyanan ug gasolina gamit ang atong kuwarta gikan sa buhis, sa higayon nga may lakaw sila mao nga dili kaayo nila mabati ang sakit sa kamahal sa petrolyo.

Apan, dili usab ko motuo nga wala sila masayod nga kitang mga yanong lungsoranon ang nagbaguod sa kalisud.